लुम्बिनी प्रदेश सरकारका भौतिक पूर्वाधार विकासमन्त्री एवं जसपा संसदीय दलका नेता सन्तोषकुमार पाण्डेले आफ्नो हस्ताक्षरको दुरुपयोग भएको बताएका छन् । उनले बुधबार एक विज्ञप्ति जारी गर्दै फरक प्रसंगमा भएको हस्ताक्षरलाई मुख्यमन्त्री शंकर पोखरेल नेतृत्वको सरकारविरुद्ध अविश्वासको प्रस्ताव दर्ता गर्दा दुरुपयोग भएको उनले बताएका हुन् ।
‘कुनै फरक प्रसंगमा भएका हस्ताक्षरलाई अविश्वासको प्रस्ताव दर्ता गर्दा दुरुपयोग गरिएकाले त्यस्तो क्रियालकप निन्दनीय छ । त्यसैगरी प्रदेशसभाको बैठक आह्वान गर्न प्रदेश प्रमुखसमक्ष गरेको समावेदनप्रति पनि सहमति नरहेको जानाकारी गराउँछु,’ उनले विज्ञप्तिमा भनेका छन् ।
भर्खरै हिउँदे अधिवेशन सम्पन्न भएको र बर्खे अधिवेशन छिट्टै बस्ने भएकाले विशेष अविधेशन बस्न आवश्यक नभएका भन्दै जसपाले अधिवेशनका लागि समावेदन नगरेको उनको भनाइ छ । पोखरेल नेतृत्वको सरकारविरुद्ध ल्याइएको अविश्वासको प्रस्तावमा पार्टीको संलग्नता नरहेकोसमेत उनले बताएका छन् ।
