व्यवसायिक रुपमा आलु खेती गरेर पालिकाभित्रका किसानलाई आत्मनिर्भर बनाउन पाल्पाको रिब्दीकोट गाउँपालिकाले पहिलो प्रयास स्वरुप किसानलाई अनुदानको आलुको बिउ वितरण गरेको छ ।
गाउँपालिकाले १५ दिने सूचना निकालेर मागको आधारमा किसानलाई ७० हजार किलो आलु वितरण गरेको छ । यो आलु ५० प्रतिशत अनुदानमा बितरण गरिएको गाउँपालिकाका अध्यक्ष नारायण कार्कीले जानकारी दिए ।
कृषिमार्फत समृद्ध रिब्दीकोट बनाउने योजनाअनुरुप व्यवसायिक रुपमा आलु उत्पादन बढाउन आलुको बिउ वितरण गरेको हो ।
गाउँपालिकाका अध्यक्ष कार्कीका अनुसार निर्वाचनमा मतदातासँग गरेको बाचा अनुसार रिब्दीकोट गाउँपालिकाबाट आ.व. २०७९÷०८० कृषि कार्यक्रम अन्तर्गत गाउँपालिका भित्रका १ हजार ४ सय घरपरिवारलाई आलुको बिउ वितरण गरिएको हो ।
कार्कीका अनुसार कार्डिनल रातो आलुको बिउ विवरण गरिएको हो । गाउँ गाउँमा दैनिक तरकारीमा उपयोग हुने आलुको व्यवसायिक रुपमा समेत विस्तारमा सहयोग पुगोस् भनेर पचास प्रतिशत अनुदानमै भएपनि उत्पादन वृद्धिको लक्ष्य सहित बिउ वितरण गरिएको कार्कीले रातोपाटीलाई बताए ।
