काठमाडौं । सुनुवाइ विशेष समितिको दुई तिहाइ बहुमतबाट प्रधानन्यायाधीशमा अस्वीकृत भएलगत्तै सर्वोच्च अदालतका न्यायाधीश दीपकराज जोशी बिदामा बसे । कायममुकायम प्रधानन्यायाधीशको हैसियतमा सुनुवाइको सामना गरेका जोशीमाथि पाँचवटा अभियोग लाग्यो । जसका कारण उनी बिदा बसे । बिदा आगामी ४ भदौ (सोमबार)मा सकिँदै छ ।
उनी बिदा बसेपछि वरीयताक्रममा उनीमुनिका न्यायाधीश ओम प्रकाश मिश्रले कायममुकायमको हैसियतमा कार्यभार सम्हाले । शुक्रबार बिहानसम्म मिश्रले कामुकै हैसियतमा मुद्दाको पेसी तोक्नेदेखि न्यायिक प्रशासनको नेतृत्व गरिरहेका छन् ।
बिदामा बसेका जोशीले शुक्रबार मुलुकी संहिता लागू भएको अवसर पारेर सचिवालयमार्फत सन्देश जारी गरे । जहाँ उनको परिचय छ, ‘कायममुकायम प्रधानन्यायाधीश तथा अध्यक्ष, न्यायपरिषद् ।’ फौजदारी र देवानी संहिता लागू भएको अवसरमा उनको सन्देशको मूल आशय छ, ‘न्यायका मान्य सिद्धान्तहरूको परिपालनाको गन्तव्यको पहिलो पाइला बनोस् ।’ आजको राजधानि दैनिकमा खबर रहेकाे छ ।
