“केही नाङ्गा प्रश्नहरु” -सुनिता खनाल

"केही नाङ्गा प्रश्नहरु"
सुनिता खनाल



प्रिय कार्ल मार्क्स

किन हुरीझैँ बहुलाउँदैनन्

तिम्रा योद्धाहरु आज ? 




जबकी–

आमाका कोमल स्तनहरु

र नानीहरुका कोमल शरीर

अझै तानाशाहका बुटमुनि छन् ।




आमाको स्वर्गजस्तो कोखमा 

बन्दुक ताक्ने को हुन् ?

बाबाको देशजस्तो छातीमा  

बम राख्ने को हुन् ?

बहिनीको जाँघभित्र

कसले घुसारेका हुन् 

चित्कारजस्तो हतियार ?

बालकहरुको गीतमा 

कसले भरेको हो क्रूरतम संगीत ?




प्रिय बुद्ध !

यो जीवन चिन्नलाई

केवल तीन प्रश्नले किन पुग्दैन

तिम्रा सिद्धार्थहरुलाई ?




प्रिय गान्धी ! 

संसार पढ्न 

संसार सुन्न

संसार हेर्न

किन पुग्दैन 

तिमीले छोपेका तीन अङ्गले ?




मानिसका सपनाहरु 

कहाँ कहाँ कैद छन् ?

प्रिय कवि !

किन बोल्दैन तिम्रो कविता ?