श्रीमती लिएर गयो बा-आमा छोडेर गयो ,  उसले सुनको चक्करमा हिरा छोडेर गयो –  नकुल पौडेल

गजल एक
यहाँ कसैले कसैलाई प्रेम गर्ने फुर्सत छैन
छ त केवल स्वार्थ छ, घृणा छ मोहब्बत छैन l

एउटाले जीवन फुल हो भन्यो अर्कोले काँडा
दुबैको परिभाषा फरक छ तर गलत छैन l

मैन कसरी आफू जलेर अरुलाई प्रकाश दिन्छ
त्यो ज्ञान त सबैमा छ मात्र आदत छैन l

‘छोरी एक्लै बजार गएर फर्केको’ कथा पढेँ
कथा त राम्रो छ के गर्नु हकीकत छैन l

म तिम्रो लागि ताजमहल बनाउन सक्दिन प्रिय
म संग मजदुरको हात काट्ने हिम्मत  छैन l

गजल दुई
जीन्दगानी सधैँ एकनास कहाँ हुन्छ र ?
जता चाह्यो उतै बतास कहाँ हुन्छ र ?

बिहे गरे देखी हो उ झन् बिग्रिएको
हरेक मान्छे कालिदास कहाँ हुन्छ र ?

बगौँचामा पनि फुल्न सकेन एउटा फुल
सबै फुल लालीगुराँस कहाँ हुन्छ र ?

पहिला आफ्नै देश फर्कौँ अनि बाझो फोरौँ
राता रात देशको विकास कहाँ हुन्छ र ?

कहिलेकाहीँ होसमा पनि लेख्ने गर्छु गजल
सधैँ भरी छेउमा गिलास कहाँ हुन्छ र ?

गजल तीन

श्रीमती लिएर गयो बा-आमा छोडेर गयो l
उसले सुनको चक्करमा हिरा छोडेर गयो l

जो बाचुन्जेल मरिरह्यो पैसा पैसा भनेर
मरेपछि उसले पनि पैसा छोडेर गयो l

बेपत्ता भाइ सम्झेर आमा अझै रुनुहुन्छ
युद्धले नमिठो सम्झना एउटा छोडेर गयो l

गाउँमा मोटर आएको हल्ला सुनेछ बाहिर
छोराले थालमा पस्केको खाना छोडेर गयो l

हिजो जुन चिठ्ठी मैले तिमीलाई पठाएथे
त्यही चिठ्ठी घरमा कबाडिवाला छोडेर गयो l

नकुल पौडेल
रुपन्देही