गृहपृष्ठ खबर ‘पोर्न साइट’ले बलात्कार बढायो: गृहमन्त्री

‘पोर्न साइट’ले बलात्कार बढायो: गृहमन्त्री

प्रकाशित मिति:

गृहमन्त्री रामबहादुर थापाले इन्टरनेटमा सहजै उपलब्ध हुने अश्लील सामग्रीका कारण बलात्कारका घटना वृद्धि भएको बताएका छन्।

गृहमन्त्री रामबहादुर थापा

 बुधबार संसदको राज्य व्यवस्था समितिमा बोल्दै उनले भने, ‘इन्टरनेटमा पाइने अश्लील सामग्रीका कारण बलात्कारका घटना बढेका हुन्।’

गृहमन्त्रालयले केही दिन पहिले इन्टेरनेटका अश्लील सामग्री उपलब्ध गराउने साइट नियन्त्रण गर्न निर्देशन दिएको स्मरण गर्दै उनले पुँजीवादका कारण बलात्कार घटना वृद्धि भएको दाबी गरे।

इन्टरनेटमा यौन खोजीको पछिल्लो १२ महिनाको ट्रेन्ड हेर्दा नेपाल अश्लील सामग्री खोजी गर्ने मुलुकमध्ये विश्वकै अग्रणी मध्येमा पर्दछ। गुगल ट्रेन्डको विगत १२ महिनाको तथ्यांकअनुसार यौनजन्य भिडियो वेबसाइट पोर्नहब ब्राउज गर्ने मुलुकमध्ये नेपाल विश्वमै दोस्रो नम्बरमा छ।

हेर्नुहोस् तथ्यांक:

 

पाेर्नहब अधिक हेर्ने देशहरू माथिबाट तल

पाेर्नहब अधिक हेर्ने देशहरू माथिबाट तल

गृहमन्त्रीले बलात्कार बढ्नुको अर्को मुख्य कारण मदिराको खुला बिक्री वितरण रहेको उल्लेख गरे। मुलुकभरि बलात्कारका घटना बढ्दै गएकाे सन्दर्भमा बुधबार गृहमन्त्री थापा राज्य व्यवस्था समितिमा उपस्थित भएका थिए।

मदिराको कारोबारबाट ४०–४५ अर्ब राजस्व उठ्ने गरी पनि त्यसका कारण खर्बौं नोक्सानी भइरहेको उनको तर्क थियो। ‘मदिरा लिमिटमा खाए औषधि हो बढी खाए विष सर हो’, उनले भने, ‘अब हामीले मदिरा नियन्त्रण गर्नेतर्फ सोच्नुपर्छ।’

गृहमन्त्री थापाले कञ्चनपुरकी १२ वर्षीया बालिका निर्मला पन्तका हत्यारा छिटै पक्राउ पर्ने दाबी पनि गरे। केही घटना राजनीतिकरण गरिएको उनको भनाइ थियो।

निर्मलाको दुई महिनाअघि बलात्कारपछि हत्या भएको थियो। राज्यले घटनाका दोषी अझै पत्ता लगाउन सेकेको छैन।

प्रकाशित १० असोज २०७५, बुधबार |

सम्बन्धित् समाचार