दशैँ किन आइस् ?
घरका भित्ता पोतेकै छैन
गरिखाने खेत जोतेकै छैन
छोरछोरीको कपडा सिलाएकै छैन
खर्चको मेसो मिलाएकै छैन
नाङ्गो शरीर ढाक्नै मुस्किल छ पहिले
छोरछोरी भन्छन् खसी ढाल्ने कहिले
हुने खानेको त खाइस् खाइस्
ए दशैँ !!
हामी गरिबलाई चुस्न तँ
फेरि किन आइस् ???
खेतको धान स्याहारेकै छैन
पोहोरको ऋण तिरेकै छैन
स्वास्नीको गुन्यु किनेकै छैन
सुख के हो अझैसम्म चिनेकै छैन
आफ्नो खुसी त कहिले हो कहिले
परिवारकै खुसी पुरा भाछैन पहिले
पोहोर परार त आइस् आइस्
ए दशैँ !!
यसपालि नि दुख दिन तँ
फेरि किन आइस् ???
स्वास्नीको भोक मेटिएकै छैन
छोरीको बैँस पनि छेकिएकै छैन
सिरक डसनाका खोल फेरेकै छैन
भत्केको छानो त हेरेकै छैन
बिहान बेलुकीको छाक टार्ने कसरी
दशैँ दशालाई फेरि तार्ने कसरी
छोराछोरी त रुवाइस् रुवाइस्
ए दशैँ !!
हामीलाई पनि रुवाउन तँ
फेरि किन आइस् ???
साहुको ऋण तिर्ने टुंगो छैन
खाली खुट्टाले नछोएको ढुङ्गो छैन
जीवन नैया हाक्नै दुख पाएको बेला
अभावकाे पहिरो माथमा आएको बेला
गरिबकै टाउकोमा फेरि बज्रपात पार्न
दुखरुपी समुन्द्र बनाई आँशुलाई झार्न
धनीका घरमा त खुसी लिई आइस्
ए दशैँ !!
तर हामी गरिबकहाँ तँ
दुख लिई फेरि किन आइस् ???
ए दशैँ ! फेरि नि तँ किन आइस् ???
रमेश पौडेल
