१० कार्तिक , कपिलवस्तु
६७ औं दधि जयन्तिको अवसर पारेर शनिवार दधि स्मृती साहित्य समाज कपिलवस्तुले राष्ट्रिय कवि गोष्ठि, रचना वाचन, कृति विमोचन तथा स्रष्टा सम्मान कार्यक्रम सम्पन्न गरेको छ । वाणगंगा नगरपालिका बैरिया स्थित जेसिज सभाहलमा आयोजित कार्यक्रममा ५ नम्बर प्रदेश सँगै पुर्व मेची देखि सुदुरपश्चिम् सम्मका प्रतिनिधि मुलक कविहरुको उपस्थितिमा कार्यक्रम सम्पन्न भएको छ ।
कार्यक्रममा भाषा , कला र साहित्य क्षेत्रमा योगदान पुर्याउदै आएका विभिन्न जिल्लाका स्रस्टाहरू सम्मानित भएका छन् । वरिष्ठ कवि एवम् साहित्यकार मनिराज जोशी शिव तुलसा छन्द रथी साहित्य पुरस्कारबाट सम्मानित भएका छन् । त्यस्तै कार्यक्रममा दमक झापाका गजलकार लोकेन्द्र बन्जरा आदित्य जंग गजल गौरब साहित्य पुरस्कारबाट सम्मानित भए भने नवलपरासीका छन्द कवि लोकनाथ खराल टिकाराम काव्य साधक साहित्य पुरस्कार बाट सम्मानित भएका हुन तेस्तै युवा कवि मनोज भण्डारी अर्पण छन्द प्रतिभा पुरस्कार र बाँकेकि गजलकार शान्ती अधिकारी पोख्रेल बासुदेव गजल साधक साहित्य पुरस्कार बाट सम्मानित भएकी छिन् । कार्यक्रममा कपिलवस्तुकी बाल कवि जोशीका कंडेल ‘निशा’ प्राची बाल साहित्य प्रतिभा पुरस्कार बाट सम्मानित भएकी थिइन भने नुवाकोटका बाल कवि सुबिन रिमाल प्रशान्त लाई आदित्यराज बाल साहित्य प्रतिभा पुरस्कार प्रदान गरिएको छ ।
५ नम्बर प्रदेश सँगै देशका विभिन्न जिल्लाबाट उपस्थित साहित्यकार एवम कवि ,गजलकारहरुले आ-आफ्ना रचना समेत वाचन गरेका थिए । राष्ट्रिय भावले ओतप्रोत कविता र गजल सँगै कार्यक्रममा कृति समेत विमोचन भएको छ । कपिलवस्तुका साहित्यकार लेखनाथ घिमिरेको मेरो देश शिर्षकको कविता संग्रह सोहि कार्यक्रममा विमोचन गरीएको हो । विमोचन गरीएको संग्रहमा ३३ वटा कविता रहेका छन् ।
कार्यक्रमलाई सम्बोधन गर्दै प्रमुख अतिथि काशी हिन्दु विश्व विद्यालयका अतिथि प्राध्यापक डा. शिव प्रसाद पौड्यालले साहित्यकारहरुले देशको धर्म, संस्कृति तथा ईतिहासलाई झल्काउँने रचनाहरुमा कलम चलाउँन आवश्यक रहेको बताए । उनले कपिलवस्तु एक साहित्यिक भुमि भएकाले यहाँको साहित्यीक स्तर पनि उच्च रहेको जिकिर गरे । दधि स्मृति साहित्य समाज कपिलवस्तु राष्ट्रिय स्तरको संस्था भईसकेको र यसलाई अझ उच्च बनाउँन आफुले सकेको सहयोग गर्ने प्रतिवद्धता समेत ब्यक्त गरे । साथै उनले साहित्यकारहरु राष्ट्रका गहना भएकाले साहित्यकारहरुलाई संरक्षण गर्ने जिम्मा राज्यको भएको बताए । साथै उनले साहित्यकारहरुले देशको मर्म बुझेर देशको राजनितिक, सामाजिक, समसामायिक, समाजमा भएका विकृतिहरुलाई पनि उजागर गर्ने र समाजमा सकारात्मक प्रभाव पार्ने खालका रचनाहरु लेख्न आवश्यक रहेको बताए । कार्यक्रममा दधि स्मृति साहित्य समाज कपिलवस्तुका अध्यक्ष दिलिप कार्कीको अध्यक्षता सहित काशी हिन्दु विश्वविद्यालय वाराणिसीका अतिथि प्राध्यापक डा . शिव प्रसाद पौड्यालको प्रमुख आतिथ्यता रहेको थियो । कार्यक्रममा उपस्थित कविहरुले रास्ट्र भावले भरिएका कविता र गजल वाचन गरेका थिए । साथै सोहि कार्यक्रमका विच दधि स्मृति साहित्य समाजले आफनो चौथो वार्षिक साधारण सभा पनि सम्पन्न गरेको छ । जसमा दिलिप कार्कीको अध्यक्षतामा नौँ सदस्यीय समिती सर्वसम्मत निर्वाचित भएका छन् ।
