गृहपृष्ठ कला/साहित्य निर्दोष जीवनको मैयाँ -सुरेन्द्र अस्तफल

निर्दोष जीवनको मैयाँ -सुरेन्द्र अस्तफल

प्रकाशित मिति:

निर्दोष जीवनको मैयाँ -सुरेन्द्र अस्तफल
शम्भु गिरी अभागी हुँदै निर्दोष जीवन बनेका ,गजलकार हुँदै गायक र नायक बनेका पहिले कविडाँडाका अहिंले गैँडाडाँडामा बस्ने व्यक्ति हुन् निर्दोष जीवन । शम्भु गिरीको पछाडि अभागी जोडेर गजल लेख्ने उनी एकाएक गायक,नायक र कथाकार बन्दा निर्दोष जीवनको रूपमा चिनिएँ । अहिले मसँग उनको मैयाँ कथासङ्ग्रह छ ।

मैयाँ अर्थात् राजकन्या,राजकुमारी,मैयाँसाहेब । छोरी चेलीलाई स्नेहपूर्वक सम्बोधन गर्दा प्रयोग गरिने शब्द । सारीको सप्को दाहिने हातले उचालेर कटाक्ष गरेको आवरण।

निर्दोष जीवनले भर्खरै कथाख्यान भन्दै सार्वजनिक गरेको १९ वटा कथाहरूको सङ्ग्रह हो – मैयाँ । eureka को प्रकाशन हो मैयाँ ।रामलाल जोशी ,नीलम कार्की निहारिका,धनराज गिरी र लेखराम सापकाेटाका कथासम्बन्धी कम र कथाकारलाई माया गरेर लेखिएका हरफहरू पृष्ठभूमिका रूपमा रहेका छन् : मैयाँभित्र ।

मैयाँभित्रका कथाका की यस्ता छन्-

मलाई बाँच्न देऊ (५पृष्ठ) -गर्भपतन गराउने संस्कृतिमा केन्द्रित,सन्तानप्रति पुरुषको व्यामोह,बच्चा र आमाको संवादमा स्वैरकाल्पनिक संवाद, आमा र छोरा दुबैको मृत्यु, कारुणिक कथा।

यस्तो पनि(११)- सपनाको माध्यमबाट दुर्घटित प्रेमको चित्रण,प्रगतिचेतनातर्फ उन्मुख , निम्नवर्गीय जीवनको चित्रण ।

आँखाको कसिङ्गर (५)- पारिवारिक विखण्डन र त्यसको प्रभाव,कमाइ नहुँदा आँखाको कसिङ्गर बन्नु पर्ने यथार्थको प्रकटन।

भाग्यरेखा (७)- प्रेममा त्याग र समर्पण हुने भावको प्रकटन, विधवा भएकी प्रेमिकालाई जीवनसाथी बनाउन स्वीकार गरिएको , प्रगतिशील विचार ।

मैयाँ (८)-आर्थिक र पारिवारिक समस्याले जीवन बेच्न बाध्य केही प्रतिनिधि पात्रहरूको जीवन भोगाइ, पैसा कमाउने धन्दामा लाग्दा प्राणघातक रोग एड्सबाट पीडित हुनु परेको ।

कमाइ(४)- जीवन धान्न सोझो तरिका असफल भएपछि चोरीधन्दामा लाग्नुपरेको अवस्थाको चित्रण ।

शिक्षाको दियो(८)- नारीशिक्षामाथि प्रकाश पारिएको कथा।

नखाएको विष ४/
– नखाएको विषले पिरोलेको सन्दर्भ, रक्याहा बाबुका कारण छोरा जेल जानुपरेको अपत्यारिलो प्रसङ्ग ।

पाठ(७)- वरपीपल साँची राखी खाएको प्रेम कसम एकतर्फी रूपमा तोडिएको , प्रेम सस्तो र समयानुसार बदलिँदो जिनिस बनेको प्रसङ्ग ।

नजर(६)-केटौले जोस र त्यसको परिणति,फिल्मी शैलीको कथा ।

सन्तान सुख(५)-सन्तानप्रतिको आमाबाबुको अतिशय भावुकता, आमाबाबुलाई वृद्धाश्रममा ठेगान लगाउने आधुनिक छोराछोरीको चित्रण ।

पछुतो(४)-कुलतको परिणाम। कृतज्ञ हुनु पर्ने व्यक्ति कृतघ्न बनेको चित्रण ।

धर्म(४)-कर्मअनुसार फलप्राप्ति हुने सन्देश।

प्रेम र विश्वास(४)- अन्तर्जातीय प्रेमविवाह र त्यसमा पनि अन्तर्घात भएको चित्रण ।

अधुरो सपना (३)-बस दुर्घटनाको कारण सम्भावना बोकेको इच्छाको मृत्यु ।

मर्नुअघिको भेट(४)-छोराछोरीको भावना विपरीत जबरजस्ती विवाह गर्दा हुने परिणति,विधवा विवाहको पक्षपोषण।

घमण्ड(३)-छोरीलाई हेला गर्ने प्रवृतिको विरोध,छोरीले अभिभावकत्व ग्रहण गरेको चित्रण ।

शङ्कामा मित्रता(४)- अनावश्यक शङ्काले लङ्का डढाउने सङ्केत ।

समग्रमा मैयाँ कथामा निर्दोष जीवन
– अति सरलताका साथ छाएका छन् ।
– वर्णनात्मकतामा विश्वास गर्छन्।
– प्रेमलाई सिरानी हाल्छन् ।
– सामान्य पाठकदेखि सबैले बुझ्ने लेख्छन्
– नारी उत्पीडन र अन्तर्जातीय कुरा गर्छन् ।
– सामाजिक जीवनका मसिनामसिना पक्ष खोतल्छन् ।
– कतै कथाको बिट मार्न हतार गर्छन् भने कतै राजमार्गझै दौडिन्छन् ।
– परिवेश,द्वन्द्व,कौतुहलतालाई महत्व नदिई घटनाको विवरणमा जोड दिन्छन् ।

मन परेका हरफहरू– आमा ,नरुनु न ! तपाईँ रुँदा मलाई पनि रुन मन लाग्छ ।(मलाई बाँच्न देऊ,पृ१५)
– [ ] मन त्यसै हुरीले उडाएर लगेको पात जस्तो भएको थियो ।उनको सिउँदोको राजमार्गमा अरु कसैले सिन्दुर हालेको थियो ।(भाग्यरेखा,पृ.३८,३९)
– [ ] बाउ मरे सुरा र आमा मरे टुहुरा भनेझैँ भई मैयाँ । (पृ.४२)
– [ ] डाँडामाथिको घामजून बनिसकेका थिए, बाआमा ।(पाठ,पृ.७०)

सम्बन्धित् समाचार