कपिलवस्तुमा एक जना ब्यक्तिले आफ्नो शरीरमा मट्टितेल छर्किएर आगो लगएका छन् । कपिलवस्तुको शिवराज नगरपालिका वडा नम्वर ५ चन्द्रौटा बजार नजिकै दिहवाका ३५ बर्षिय बदु मियाले अाफैमाथि मट्टितेल छर्किएपछि उनकाे ज्यान गएकाे हाे ।
शनिबार आफ्नै शरीर जलाएका मियाँको आज उपचारको क्रममा पाल्पाको मिशन अस्पतालमा ज्यान गएको प्रहरीले जानकारी दिए । मियाँ शनिवार दिउँसो दिवाह गाउँका सहदअलि मियाँको नयाँ घरमा रङ्ग लगाउने काम गर्न गएका थिए ।
वडा प्रहरी कार्यालय चन्द्रौटाका अनुसार उनले घरधनीलाई रङ्ग लगाउनका लागि मट्टितेल किनेर ल्याउन लगाएको र खाजा खानका लागि पैसा समेत मागेका थिए । घरधनीबाट मट्टिते लिएर छतमा रंग लगाउन गएकाे केहिबेरपछि उनी छतबाट शरिरमा आगाको ज्वाला सहित बचाओ भन्दै भुँईमा खसेको घरधनीले बताएको वडा प्रहरी कार्यालयका प्रमुख प्रहरी निरीक्षक महेश्वर उपाध्यायले बताए ।
उपाध्यायका अनुसार मुम्वईमा रहेकी श्रीमति मुगुन मियाँसंग सम्वन्ध राम्रो नभएपछि उनलाई उतै छाडेर मियाँ दुई महिना अघि मात्र घर आएर कहिले काम गर्ने त कहिले त्यतिकै भौतारिन्थे । उनका सात बर्षिय छोरा समेत आमा संगै रहेको बताईएको छ । डरलाग्दो अबस्थामा जलेका मियाँलाई थप उपचारका लागि बुटवल पुराईएको थियो । त्यहाँ पनि उपचार सम्भव नभएपछि पाल्पा पठाईएको प्रहरी निरीक्षक उपाध्यायले बताए ।
शव पोष्टमार्टमका लागि जिल्ला अस्पतालमा पाल्पामा पुराई उनका बाबुृलाई उनको शव बुझाइसकेको प्रहरीले जनाए । यस घटनाका सम्वन्धमा थप अनुसन्धान गरिने जिल्ला प्रहरी कार्यालय कपिलवस्तुका प्रवक्ता डिएसपी रवि रावलले जानकारी दिए ।
