प्रदेश सभा सदस्य अर्जुन कुमार केसीले टोल सरसफाई कार्यक्रममा झाडु लिएर सडकमा निस्किएपछि अन्य नागरिकहरु पनि निस्कन वाध्य भए । बुधवार विहानै विकास र न्यायका लागी एकल महिला संस्थाले आयोजना गरेको सरसफाई कार्यक्रममा उनी झाडु लिएर सरसफाईको लागी निस्किएका हुन ।
लागुऔषध दुरुपयोग तथा ओसारपसार विरुद्धको अन्तराष्ट्रिय दिवसको अवसरमा डिभिजन वन कार्यालय गौतमवुद्धको सहयोगमा सरसफाई कार्यक्रम सञ्चालन भएको हो । कार्यक्रममा सहभागी हुँदै प्रदेशसभा सदस्य अर्जुन कुमार केसीले सरसफाई अति आवश्यक रहेकोले यसमा ध्यान दिन आग्रह गरे । आफ्नो घर अगाडि आफैँ सफा गर्नुपर्ने भएकोले कसैको आशमा वस्न नहुने उनले बताए ।
सवै घरपरिवारलाई सरसफाई अभियानमा सहभागी हुन आग्रह गर्दै सांसद केसीले फोहरमैलाबाट बच्न सचेत गराए । केही ब्यवसायीहरुले फोहोर ब्यवस्थापनमा ध्यान नदिएको भन्दै लापरवाही नगर्न आग्रह गरे ।
शिवराज नगरपालिकाका नगर प्रमुख नेत्रराज अधिकारीले सरसफाई नागरिकको अमुल्य सम्पती रहेकोले बेलैमा सचेत नभए अकालमै ज्यान जान सक्ने जनाए । परिवारका कुनै पनि सदस्यले सरसफाईमा लापरवाही गरे परिवारनै सिकार बन्न सक्ने भएकोले सचेत हुनुपर्नेमा उनले जोड दिए । नगरलाई पुर्ण सरसफाई बनाउने तयारी रहेकोले सफल पार्न सवैको सहयोग आवश्यक रहने अधिकारीले जिकिर गरे ।
कार्यक्रममा विभिन्न संघ सस्थाका प्रतिनिधि, राजनितिक दल, समाजसेवी, बाल क्लवलगायत दुई सय वढीको सहभागीता रहेको थियो ।
