बाणगंगा नगरपालिकाले हात्तीपाइले रोग विरुद्ध निर्माण व्यवसायी तथा श्रमिकहरुका लागी नगर स्तरीय अभिमुखिकरण कार्यक्रम सम्पन्न गरेको छ । हात्तीपाइले रोग विरुद्ध आम औषधी सेवन अभियान अन्तर्गत उक्त कार्यक्रम आयोजना गरीएको हो । कार्यक्रममा बाणगंगा नगरपालिका भित्रका निर्माण व्यवसायीलाई सहभागिता गराई बाणगंगा नगरपालिका स्वास्थ्य अधिकृत भक्ति पाण्डेद्धारा प्रशिक्षण दिइएको थियो । स्वास्थ्य अधिकृत पाण्डेले हात्तीपाईले रोगका लक्षण तथा बच्ने उपायबारे स्पष्ट पार्नुभएको थियो ।
गतवर्ष नगरपालिका भित्र ६२ हजार व्यक्तिलाई हात्तीपाइले रोग विरुद्धको औषधी खुवाईएको र यस वर्ष ८० हजारलाई औषधी खुवाईने लक्ष्य रहेको स्वास्थ्य अधिकृत भक्ति पाण्डेले जानकारी दिनुभयो । समान्यतया आम सर्वसाधरणमा हात्तीपाईले रोग विरुद्धको औषधी खाई सकेपछि टाउको दुख्ने,निध लाग्ने तथा विभिन्न समस्या आईपर्छ भन्ने कुरा गलत भएको र केही व्यक्तिले औषधी नखाने गरेको पनि पाइएकाले त्यस्तो प्रवृति त्याग्न सबैलाई आग्रह पाण्डेले गर्नुभयो ।
११ औं पटकसम्म औषधी खुवाउदा पनि हात्ती पाइले रोगको संक्रमण बढि देखिएपछि अभियान यसवर्ष पनि संचालन हुने भएको पाण्डेले बताउनुभयो । नेपाल सरकारको हात्ती पाइले रोग निवारण गर्ने लक्ष्य कपिलवस्तु सहित १३ जिल्लामा पुरा हुन नसकेपछि औषधी खुवाउने अभियानलाई निरन्तरता दिनुपरेको स्वास्थ्य कार्यालय कपिलवस्तुले जनाएको छ । राष्ट्रिय हात्ती पाइले रोग निवारण अभियान २०७६ को जिल्ला स्तरीय समन्वय समिति कपिलवस्तुको वैठकले हात्ती पाइले रोग विरुद्ध औषधी खुवाउने अभियानलाई प्रभावकारी बनाउने बताएको छ ।
सामान्य तय छैठौं पटक सम्म नियमित औषधी खुवाएपछि हात्तीपाइले रोगको संक्रमण दर घट्नु पर्ने हो, तर घटेन । लामखुट्टेको टोकाईबाट सर्ने माइक्रो फाइलेरिया १ प्रतिशत भन्दा कममा झार्ने लक्ष्य थियो तर कपिलवस्तुमा नमुना सर्वेमा यो दर १२ दशमलब ५ प्रतिशत रहेपछि अभियान असफल भएको हो । २०७५ सालमा वाणगंगा, कृष्णनगर र महाराजगंज नगरपालिकामा हात्ती पाइले रोगको नमुना सर्वेक्षण गरिएको थियो ।
कपिलवस्तु जिल्लामा माघ २५ गते देखि २ वर्षदेखि ७० वर्ष उमेरका व्यक्तिलाई हात्ती पाइले रोग विरुद्धको औषधी खुवाइने अभियान संचालन हुदैछ । जसअन्तर्गत बाणगंगा नगरपालिकामा माघ २५ गतेदेखी प्रभावकारी ढङ्गले हात्ती पाइले रोग विरुद्धको औषधी खुवाइने बताइएको छ ।
