कपिलवस्तुको वाणगंगा नगरपालिकाले चीनबाट फैलिएको कोरोना भाइरस (कोभिड १९) ले विश्व आक्रान्त पारिरहेको अवस्थामा नजिकीदै गरेको रंगहरुको पर्व होली सामान्य रुपमा मनाउन नगरवासीहरुलाई आग्रह गरेको छ । विहीबार बसेको नगर कार्यपालिकाको बैठकले भाइरसबाट बच्नका लागि भिडभाडमा नजान, ठूला ठूला कार्यक्रम आयोजना नगर्न निणर्य गरेको हो । यससंगै प्रधानमन्त्री स्वरोजगार कार्यक्रमका लागि चालु आ.व.का योजना समेत छनोट गरेको छ । बैठकले १ सय दिने बेरोजगारलाई रोजगार दिने गरी योजना छनोट गरेको हो ।
केन्द्र सरकारले हरेक स्थानीय तहलाई १० लाख देखि ७५ लाखसम्म वेरोजगार नागरिकका लागि रोजगारी दिने गरी बजेट छुट्याउने गरेको छ । सोही अनुसार रु.७५ लाख बजेट वाणगंगा नगरपालिकाले प्राप्त गरिसकेको र सो रकम विभिन्न वडाको विकास निर्माणका काममा खर्च गर्ने गरी योजना छनोट गरेको नगरपालिकाका प्रवक्ता विष्णु प्रसाद पौडेलले जानकारी दिए । उनले गत बर्ष बेरोजगार फारम भरेकाहरुले मात्र यो अवसर पाउने बताए ।
प्रत्येक वडामा बेरोजगारहरुको तथ्याङ्क रहेको भन्दै सोही तथ्याङ्कको आधारमा रोजगारी दिने गरी प्रक्रिया अगाडी बढाइने बताइएको छ । यो बर्ष समयमै बजेट आएकोले काम प्रभावकारी देखिने विश्वास नगरपालिकाले लिइएको छ ।
यसैगरी नगर कार्यपालिकाको बैठकले तराई मधेस समृद्धि कार्यक्रमको लागि पनि योजना छनौट गरेको छ । मधेशका लागि सिंचाई, स्वास्थ्य, सडक र शिक्षालाई बढी जोड दिएको योजना बनाई बजेट माग गरिएको प्रवक्ता पौडेलले बताए ।
