ईलाका प्रहरी कार्यालय पिपराको आयोजना तथा वाणगंगा नगरपालिका वडा न.८ बोडगाउँको सहकार्यमा बाल बिबाह न्यूनिकरण सम्वन्धी सचेतना कार्यक्रम सम्पन्न गरिएको छ । वडा कार्यालयको सभाहल बोडगाउँमा सम्पन्न भएको कार्यक्रममा इलाका प्रहरी कार्यालय पिपराका प्रहरी निरीक्षक दिनेश गुरुङले बाल विबाह हुनुका कारण, महिला हिंसाका घटनाहरु घट्नु र यसको न्यूनिकरण गर्न वडामा बाल संजालको भूमिका महत्वपूर्ण रहेको बताउनुभयो ।
उहाँले कानूनले बिबाह गर्न निर्धारण गरेको २० वर्ष भन्दा कम उमेरमा विवाह भएमा वाल बिबाह ठहर्ने र त्यसरी बिबाह गरेमा कसुर गर्ने व्यक्तिलाई ३ वर्ष कैद र ३० हजार जरीवाना हुने कानूनी व्यवस्था रहेको बारेमा पनि जानकारी गराउनु भएको थियो । घरेलु हिंसा, शारीरिक तथा मानसिक रोग आदि समस्याहरुका कारण हुने बाल बिबाह समाजको मूल समस्याका रुपमा रहेबो बताउनुभयो ।
१५ दिने बालविवाह विरुद्धको सचेना अभियान अन्र्तगत आयोजना गरिएको सो कार्यक्रममा सरोकारवालाबाट समाजका हरेक संगठन र प्रहरीले हातेमालो गरेर अगाडी बढ्नुपर्नेमा जोड दिएका थिए ।
कार्यक्रममा वडाध्यक्ष गुणनिधि भुसालले वडा न.८ लाई कोरोनाको महामारी कम भएमा आगामी चैत्र मसान्तसम्म वालमैत्री वडा घोषणा गर्न अभियान संचालन गरिएको बताउनुभयो । उहाँले वालमैत्री वडा घोषणा गर्नका लागि आवश्यक सूचकहरु पूरा गर्दै बाल शिक्षा, बाल हिंसा लगायतका सूचकहरुलाई न्युनिकरण गर्दै अगाडी बढेको बताउनुभयो ।
कार्यक्रममा वडा वाल संजाल, वालक्लव, वालमैत्री समन्वय समिती, निगरानी समिती, सबै टोल बिकास समितीका पदाधिकारीहरुको सहभागिता रहेको कार्यक्रमको सहजीकरण वडा सदस्य गीता भुसालले गर्नुभएको थियो ।
