कपिलवस्तु, बैशाख ६
नेपाल विद्यार्थी संघ (नेविसंघ) को स्थापना दिवसको अवसरमा मृगौला पिडितलाई सहयोग गरिएको छ । संघको ५२ औँ स्थापना दिवसको अवसर पारि नेविसंघ क्षेत्र नं. १ कपिलवस्तुले बाणगंगा नगरपालिका वडा नं. ८ पुल्चोक निवासी मृगौला पिडित शिवकला रेश्मीलाई खाद्यान्न, लत्ताकपडा, झुल लगायतका सामग्रीहरु प्रदान गरेको हो ।
पति शोकमा परेकी शिवकलाको दुवै मृगौला फेल भएका कारण नियमित डायलासिस गराउदा आर्थिक स्तर निकै कमजोर भएकोले सहयोग गरिएको नेविसंघ क्षेत्रीय सभापति चन्द्रकान्त पोख्रेलले बताएका छन् । आर्थिक स्तर कमजोर भएका कारण मृगौला पिडित शिवकलाका दुवै छोराहरु पढाई छाड्न बाध्य भएका थिए ।
बाणगंगा नदिको किनार छेउमा भाडामा बस्दै आएका उनका छोराहरुले दिनभरी नदीको वालुवा चालेर उपचारमा सघाएको मृगौा पिडित शिवकलाले भावुक बन्दै बताईन् । अब भने दुवै छोराहरुलाई पनि नेविसंघ क्षेत्र नं. १ र नेविसंघ सिद्धार्थ क्याम्पस ईकाई कमिटिले निःशुल्क रुपमा अध्ययन गराउने भएको छ । छोराहरुलाई पढाउने मनहुँदाहुंदै पनि पतीको मृत्यु, आफु मृगौला पिडित र आर्थिक स्तर कमजोर भएका कारण पढाउन नसक्दा आफु निकै चिन्तित रहेको शिवकलाले बताईन् ।
नेपाली कांग्रेस महा समिति सदस्य दुर्गा सेन, तरुण दल जिल्ला सभापति शक्ति सिं. ठकुरी, नेविसंघ क्षेत्रीय सभापति चन्द्रकान्त पोख्रेल, सिद्धार्थ क्याम्पस ईकाई सभापति दिनेश क्षेत्री, नेविसंघ नेता खिमानन्द घिमिरे, सुवास पौडेल, सुशान्त पोख्रेल, विवेक पौडेल, यमलाल पाण्डे लगायतको टोलीले पिडितको घरमा गई सहयोग गरेको हो ।
