कपिलबस्तु : कपिलबस्तुबाट बैशाख ६ गतेदेखि हराएका तिनजना बालिकालाई कपिलवस्तु प्रहरीले भारतको कानपुरबाट उद्धार गरी परिवारको जिम्मा लगाएको छ । घरबाट बाख्रा चराउन तिनजना बालिका राति अबेरसम्म घर नफर्किएपछी प्रहरीले खोजी शुरु गरेको थियो । १३ बर्षकी राधा पासी, बर्ष ८ की छोटि कोहार र बर्ष ५ की चिन्की कोहार रहेका छन् ।
जिल्लाको महाराजगन्ज नगरपालिका वडा नम्बर ८ सिग्रहवाका तिनजना बालिकालाई भारतको कानपुरबाट सकुशल उद्धार गरि आफन्तको जिम्मा लगाईएको कपिलवस्तु जिल्ला प्रहरी प्रमुख प्रहरी उपरीक्षक नवराज अधिकारीले जानकारी दिए ।
बालिकाहरु हराएको थाहा पाएपछि जिल्ला प्रहरी कार्यालय कपिलवस्तुबाट प्रहरी निरीक्षक प्रेम प्रसाद रेग्मीको कमाण्डमा ७ जनाको टोलि, वडा प्रहरी कार्यालय चन्द्रौटाबाट प्रहरी निरीक्षक शंकर प्रसाद आचार्यको कमाण्डमा ७ जना र ईलाका प्रहरी कार्यालय कृष्णनगरबाट पनि प्रहरी निरीक्षक शुकदेव पौडेलको कमाण्डमा ५ जनाको प्रहरी टोलि खोजतलासमा लागेको थियो ।
प्रहरीले बालिकाका परिवारसग सोधपुछ गर्दा भारत गएको हुनसक्ने आशंकामा सिमा पारी तर्फ खोजी शुरु गरेको थियो । बालिकाहरुको फोटोसहितको हुलिया विवरण कपिलवस्तु सगै भारत उत्तप्रदेश प्रहरिलाई समेत पठाएको थियो । सोही कारण बालिकाहरुलाई तिनदिन भित्रै भारतिय प्रहरिको सहयोगमा फेला पारी सकुशल उद्धार गरेको हो ।
खोजी गर्दै जादा सोरतगढस्थित महाथा बजारको रामजानकी मन्दिर परिसरमा एकरात बसि उनिहरु रेल चढेर कानपुर पुगेको प्रहरीले जनाएको छ ।
भारत सिद्धार्थनगर सोहरगढ थाना माताबजार घर भई नेपालको कपिलवस्तुस्थित महाराजगञ्ज क्षेत्रमा कवाडी सामान खरिद बिक्री गर्ने रियाज अहमद हलुवाई र मन्दिरका पुजारी रामअचल तेलीले बालिकाहरुलाई भेटेको र उनिहरु कानपुरको रेल चढेर गएको बताएपछि प्रहरी कानपुर पुगेको थियो ।
त्यतिन्जेल कानपुर स्थित दादानगर थाना गोविन्दनगर प्रहरीले फेला पारी आफ्नो संरक्षणमा राखेका बालिकाहरुलाई बिहीवार नेपाल प्रहरीको जिम्मा लगाएको हो । हराएर फेला परेकि राधिका पासीले भारत रामगढवास्थित आफ्नो मामाघर जान हिँडेको र रेल फरक परि कानपुर पुगेको प्रहरी सामु बताएकी छन्।
तिनैजना बालिकालाई नेपाल ल्याई स्वास्थ्य परिक्षण गरि अविभावकलाई जिम्मा लगाएको प्रहरी उपरीक्षक अधिकारीले बताए ।
