राजविराज : सरकारी निर्णय बेवास्ता गर्दै विद्यालय सञ्चालन गरेको आरोपमा सप्तरी प्रशासनले राजविराजका ११ वटा विद्यालयका सञ्चालक तथा प्रिन्सिपललाई नियन्त्रणमा लिएको छ । पक्राउ पर्नेमा शिब्स बोर्डिङ्ग स्कुलका सञ्चालक बिष्णुपुर गाउँपालिका–६ निवासी नरेशप्रताप साह, राजविराज–२ स्थित लिटिल फ्लावर सेकेन्ड्री स्कुलका सञ्चालक डा। कामानन्द देव, एञ्जल बोर्डिङ्ग स्कुलका सञ्चालक नरेन्द्रप्रसाद देव, पिस जोन स्कुलका सञ्चालक राजविराज–२ का उमाकान्त साह, राजविराज–१ स्थित सृजना सेकेन्ड्री बोर्डिङ्ग स्कुलका सञ्चालक रिमा झा जिल्ला प्रहरी कार्यालय सप्तरीले जनाएको छ ।
डीएसपी माधवप्रसाद काफ्लेका अनुसार ग्रिन ईङ्ंगलिस बोर्डिङ्ग स्कुलका शिक्षक राजविराज–१ का मनोज यादव, राजविराज–३ स्थित ह्यापील्याण्ड माबिका अनुशासन प्रमुख राजबिराज–५ का शैलेन्द्रकुमार ठाकुर, जानकी सेकेन्ड्री स्कुलका शिक्षक हरीकिसुन राम तथा राजबिराज– ८ स्थित लक्ष्मी ईङ्गलिस बोर्डिङ्ग स्कुलका सञ्चालकहरु राजेशकुमार यादव, बैधनाथ कुमार झा र बुलन्द साह समेत नियन्त्रणमा परेका छन् ।
राजविराज नगरपालिकाका नगरप्रमुख शम्भुप्रसाद यादव, प्रमुख जिल्ला अधिकारी फणिन्द्रमणि पोखरेल, प्रहरी उपरीक्षक राजेन्द्रप्रसाद धमला र राजविराज नगरपालिकाका वडा अध्यक्षहरुसहितको टोलीले राजविराजमा सञ्चालनमा रहेका निजी विद्यालय पुगेर उनीहरुलाई नियन्त्रणमा लिएका हुन् ।
सरकारी निर्देशनलाई अवज्ञा गर्दै विद्यालय सञ्चालनलाई निरन्तरता दिएकाले विद्यालय सञ्चालन गर्ने निजी विद्यालयका ११ सञ्चालक, प्रिन्सिपल, शिक्षकलाई नियन्त्रणमा लिइएको प्रमुख जिल्ला अधिकारी पोखरेलले बताए । प्रजिअ पोखरेलका अनुसार पटक–पटक सम्झाउँदा पनि विद्यालय सञ्चालनलाई निरन्तरता दिएपछि उनीहरुलाई नियन्त्रणमा लिनु परेको हो ।
नियन्त्रणमा लिइएकाहरूलाई राजविराजस्थित जिल्ला प्रहरी कार्यालय सप्तरीमा राखिएको छ । उनीहरूमाथि संक्रामक रोग ऐन–२०२० अनुसार कारबाही गरिने प्रजिअ पोखरेलले बताए ।
कोभिड–१९ को महामारीको रोकथाम एंव नियन्त्रणको लागि सरकारी निर्देशनअनुरुप जिल्ला प्रशासन र राजविराज नगरपालिकाले सदरमुकाम राजविराजका विद्यालयहरु वैशाख मसान्तसम्मका लागि बन्द गर्न निर्देशन दिएको थियो । त्यसविपरित यहाँका केही विद्यालय भने निरन्तर सञ्चालमा रहेका थिए ।
