कपिलवस्तु : कोरोना संक्रमणको दोस्रो लहरले कपिलवस्तुमा पनि संकट ल्याउने सम्भावना बढेको छ । लुम्बिनी प्रदेशका बाँके, रुपन्देही दाङ लगायतका जिल्लामा कोरोनाले संकट निम्ताएका बेला कपिलवस्तुमा संकट ल्याउने सम्भावना बढेको हो । नागरीकहरुले कोरोनालाई विपतको रुप नलिदाँ दिन प्रति दिन समस्या बढ्दै गएको छ । केही साता अगाडी शुन्य बाट ५ जना संक्रमितको संख्या हुँदै उक्लिको ग्राफ २५५ जना सम्म पुगेको छ ।
यस पटक आधा भन्दा वढी संक्रमितलाई नयाँ प्रकारको कोरोना भाईरसमा देखिने लक्षण देखा परेका छन् । शरिर दुख्ने, उच्च ज्वरो आउने, स्वाद थाहा नपाउने, खाना मिठो नहुने जस्ता लक्षण देखिने गरेको अधिकारीहरुले बताएका छन् । जिल्लाका सवै स्थानीय तहमा कोरोना संक्रमित फेला परेको अवस्था रहेको छ । अहिले संक्रमित हुनेमा अधिकांश सरकारी कर्मचारी, शिक्षक, स्वास्थ्यकर्मी रहेका जिल्ला स्वस्थ्य कार्यालय कपिलवस्तुका कोरोना फोकल पर्सन उमेशचन्द्र घिमिरेले बताउनुभयो ।
जिल्लामा हालसम्म ३८ जना कोरोना संक्रमितले ज्यान गुमाएका छन् । यस पटक हट्टाकट्टा संक्रमितको समेत मृत्यु भएको तथ्याङक रहेको छ । कोरोनाको दोस्रो लहर फैलिए पनि स्थानीय सरकार भने सुस्ताएका छन् । विपतको क्षति न्यूनीकरण गर्न योजना बनाएर काम गर्ने बेलामा पर्ख र हेरको निति लिए जस्तो गरेको देखिएको छ । जिल्लाका १० मध्ये ६ पालिकाले तत्काल योजना बनाई कोरोनाको प्रभाव कम गर्ने लक्ष्य लिएको छ । तर काम भने अझै सुरु भएको छैन ।
यता यशोधरा, शुद्धोदन, मायादेवी गाउँपालिका र महाराजगंज नगरपालिकामा भने योजना बनाउने संकेत समेत नभएको नाम नखुलाउने शर्तमा एक कर्मचारीले बताएका छन् । जिल्ला प्रशासन कार्यलयले भिडभाडजन्य गतिविधि नगर्न भने पनि आम नागरिकले त्यसलाई वेवास्ता गरेको देखिएको छ । तत्काल भिँडभाँड बढी हुने गतिविधी रोकिएन भने कपिलवस्तु पनि कोरोनाको हटस्पट हुने संकेत देखिएको छ ।
