काठमाडौं : टीकापुरका पदम मल्ल सामान्य अवस्थामा एक हजार चार सय रूपैयाँ बस भाडा तिरेर काठमाडौंबाट धनगढी जान्थे। तर बुधबार मल्लले दुई हजार तिर्नुपर्यो। काठमाडौं उपत्यकामा बिहीबारबाट निषेधाज्ञा हुने भएपछि बाहिर जाने बस टिकट अभाव भएसँगै उनी साविकभन्दा बढी भाडा तिर्न बाध्य भएका हुन्।
‘दुई हजार तिरेर पनि मुश्किल मात्रै गाडी पाइयो। त्यो पनि सिटमा होइन, क्याबिनमा भनेको छ। उभिएर जानुपर्ने होला, मल्लले सुनाए। सरकारले उपत्यकामा निषेधाज्ञा घोषणा गरेपछि बर्दियास्थित गुलरिया पुग्न टिकट काटेका अनिल थारूले पनि चर्को भाडा तिर्नुपरेको छ।
‘पहिले ११ सयमा लैजान्थ्यो, अहिले १६ सय लिएको छ,’उनले भने, ‘भाडा महँगो भए पनि जसरी गाउँ जानै पर्ने छ।’
सल्यानका कमल बस्नेतले रूकुमको थामारेसम्म जाने गाडी मात्रै पाए। त्यो पनि अलिकति महँगै भाडामा। उनीसहित पाँच जना साथीका लागि काटिएको टिकटमा चार हजार पाँच सय रूपैयाँ बुझाएको देखिन्छ। सामान्य अवस्थामा प्रतिव्यक्ति आठ सय रूपैयाँ लाग्ने उनले बताए। सोही स्थानका लागि हेमराज सुनार र उनका साथीलाई भने प्रतिव्यक्ति एक हजारका दरले टिकट उपलब्ध गराएको भेटिएको छ।
सानी नानी च्यापेर बसपार्कमा उभिइरहेकी रोल्पाकी रमिला बिक उभिएरै भए पनि गाउँ फर्कन तयार थिइन्।
