गुल्मीमा एकैदिन ११ जना कोरोना संक्रमितको मृत्यु भएको छ ।
पछिल्लो २४ घण्टामा गुल्मीका ११ जना कोरोना संक्रमितको मृत्यु भएको स्वास्थ्य कार्यालय गुल्मीका कोभिड–१९ फोकल पर्सन गोपाल कार्कीले जानकारी दिए ।
शनिबार दिउँसो ३ बजेदेखि आइतबार दिउँसो ३ बजेसम्म तम्घास, पाल्पा, होम आइसोलेसन, स्याङ्जा, काठमाडौं, चितवन, बुटबललगायत स्थानमा गरी नौ पुरुष र दुई महिलाले ज्यान गुमाएको कार्कीले बताए । गुल्मीमा दोस्रो चरणको कोरोना भाइरसबाट ज्यान गुमाउनेको संख्या ४९ पुगेको छ ।
गुल्मीमा अहिलेसम्म कुल एक हजार १८६ जना संक्रमित भएका छन् । तीमध्ये ९३४ सक्रिय छन् । सक्रिय संक्रमितमध्ये ८८४ जना होम आइसोलेसनमा छन् भने अन्यको विभिन्न अस्पतालमा उपचार भइरहेको छ ।
अहिलेसम्म जिल्लाका कूल २०६ संक्रमणमुक्त भएको स्वास्थ्य कार्यालयका कोभिड-१९ फोकल पर्सन कार्कीले बताए ।
