काठमाडौं : नेकपा (एमाले)को विधान महाधिवेशनमार्फत अध्यक्ष केपी शर्मा ओलीले फेरि पनि अध्यक्ष पदमा दोहोरिने उद्घोष गरेका छन्। ललितपुरको गोदावरीस्थित सनराइज हलमा तीन दिन (शुक्रवार-आइतवार)सम्म भएको विधान महाधिवेशनले उनलाई फेरि पनि अध्यक्ष हुने बाटो खुला गरिदिएको छ।
तत्कालिन नेपाल कम्युनिस्ट पार्टी (नेकपा) हुँदै अध्यक्ष पद धरापमा परेका ओलीले एमाले विभाजनपछि पनि आफ्नो पद सुरक्षित पारेका छन्। त्यसका लागि उनले आफू अनुकुल नीति विधान महाधिवेशनबाट पारित गराएका छन्। ६ हजारभन्दा बढी प्रतिनिधि सहभागी भएको विधान महाधिवेशनले ओलीको राजनीतिक प्रतिवेदन, महासचिव ईश्वर पोखरेलको संगठनात्मक प्रस्ताव र उपमहासचिव विष्णु पौडेलेको विधान संशोधन प्रस्ताव सर्वसम्मतिले पारित भएका छन्।
१० वटा समूह बनाएर छलफल भए पनि प्रस्तावहरुमाथि खासै संशोधन भने भएन। यद्यपि, उपमहासचिव पद नै खारेजी गर्न गरिएको प्रस्तावमा भने हेरफेर भएको छ। अब अध्यक्ष, महासचिव, वरिष्ठ उपाध्यक्ष १ जनासहित उपाध्यक्षहरु ५ जना, उपमहासचिव १ र सचिव सात जना गरी १५ जना पदाधिकारी हुने विधानमा व्यवस्था गरिएको छ।
उक्त विधानमा गरिएको व्यवस्था ओली अनुकुल हुने एमालेमा फरक मत राख्ने नेताहरुको बुझाइ छ। यसका साथै उमेर हद लगायतका व्यवस्थाले पनि ओलीलाई एमालेमा सहज बनाउनेछ।
धेरै पदाधिकारी बनाउन नहुने भन्दै महासचिव ईश्वर पोखरेलले धेरै लेयर बनाएर पार्टी चुस्त नहुने बताएका थिए। एमालेले पारित गराएको नीति भने उनी इतरलाई झनै कठिन बनाउने र ओलीलाई नेतृत्वका लागि सहज बनाउने देखिन्छ।
ओली हाल एमालेमा निर्विकल्प नेताका रुपमा देखिन थालेको एमाले वृतमा चर्चा छ। ओलीका समकालीन नेताहरु माधव कुमार नेपाल, झलनाथ खनाल र बामदेव गौतमले एमाले छोडिसकेको अवस्थामा उनलाई चुनौति दिने अर्को नेता अघि नसरेको ओली निकट नेताहरुको मत छ।
