काठमाडौं : नेपाली कांग्रेसको १४ औं महाधिवेशनमा महामन्त्री पदका लागि भएको निर्वाचनको मतगणना जारी छ। सानेपास्थित कांग्रेस केन्द्रीय कार्यालयमा मतगणना भइरहेको हो। सोमबारको मतदानमा ४ हजार ६७९ मतदाताले मतदान गरेका थिए ।
प्रारम्भिक मतपरिणाम अनुसार गगन थापाले अग्रता जारी राखेका छन् छन्। ११९५ मत गणना हुँदा गगनले ७५६ मत पाउँदै अग्रता कायम गरेका हुन्।
महामन्त्रीको दुई पदका लागि ६ जना उम्मेदवार प्रतिस्पर्धामा छन्। गगन थापाले अग्रता लिइरहँदा विश्वप्रकाश शर्मा र प्रदीप पौडेलबिच टक्कर छ।
विश्वप्रकाशले ४९० मत ल्याउँदा प्रदीप पौडेलले ३६९ मत ल्याएका छन्। यस्तै, प्रकाशशरण महतले ३८९, मिनेन्द्र रिजालले २२३ र राजाराम कार्कीले ३९ मत पाएका छन्।
देउवा प्यानलबाट प्रकाशरण महत र प्रदीप पौडेल प्रतिस्पर्धामा छन्। यस्तै, शेखर कोइराला प्यानलबाट गगन थापा र मीनेन्द्र रिजाल प्रत्यासी छन्। यस्तै, प्रकाशमान सिंह प्यानलबाट विश्वप्रकाश शर्मा छन्। राजाराम कार्की पनि महामन्त्रीको प्रतिस्पर्धामा छन्।
