बार्सिलोनाले खेल अवधिभर नियन्त्रण कायम राखे पनि शनिबार राति स्पेनिस ला लिगाको पहिलो खेलमा रायो भायोकानोसँग गोलरहित बराबरीमा रोकिएको छ ।
‘समर ट्रान्सफर विन्डो’मा ठूलो रकम खर्च गरेको बार्सिलोनाका प्रशिक्षक जाभी हर्नान्डेजले आन्द्रेस क्रिष्टेनसेन, रोबर्ट लेवानडोवस्की र राफिन्हा र फ्रांक केसीइलाई डेब्यु गराएका थिए । तर दुर्भाग्य, ८० हजार दर्शक उपस्थित क्याम्प नोउमा बार्सिलोना घरेलु दर्शकलाई खुसी बनाउन असफल रह्यो ।
१२औं मिनेटमा लेवानडोवस्कीको गोलबाट बार्सिलोनाले अग्रता लिएको थियो । तर, रेफ्रीले उक्त गोललाई अफसाइड घोषित गरिदिए । पहिलो हाफको अन्तिम समयमा रायो भायोकानोका अल्भारो गार्सियाले राम्रो अवसर खेर फाले । विपक्षी रक्षकलाई विट गर्दै ६ यार्ड बक्सबाट हानेको प्रहारलाई बार्सिलोनाका गोलकिपर मार्क–आन्द्रे टेर स्टेगनले बचाइदिएका थिए ।
६५औं मिनेटमा बार्सिलोनाका बैकल्पिक खेलाडी अंसु फातीको प्रहारलाई विपक्षी गोलकिपर स्टोल दिमित्रिभस्कीले बचाइदिए । त्यस्तै, अर्का वैकल्पिक खेलाडी पिइरे–इमेरिक औबमेयाङको प्रयासलाई पनि दिभित्रिभस्कीले विफल बनाइदिए । बार्सिलोनाका फ्रांक केसीइले ८८औं मिनेटमा गरेको गोललाई पनि रेफ्रीले अफसाइड घोषित गरिदिए ।
इन्जुरी समयमा कप्तान सर्जियो बुस्केटले रातो कार्डको सामना गरेपछि बार्सिलोनाले दश खेलाडीमा रहेर खेलको अन्त्य गरेको थियो । बुस्केटले राडामेल फाल्काओलाई फाउल गरेपछि दोस्रो पहेंलो कार्डको सामना गरेका हुन् ।
ला लिगामा गए राति भिल्लारियालले रियाल भालाडोलिडलाई ३–० ले हरायो । सेल्टा भिगो घरेलु मैदानमा स्पानियोलसँग २–२ को बराबरीमा रोकिँदा सेभिया ओसासुनासँग २–१ ले पराजित भयो ।
