वैखरी अनलाइन, बुद्धभुमी
कपिलवस्तु जिल्लाको हकमा बृजेश कुमार गुप्ताको परिचयका लागी उनको नाम भए पुग्छ । हालका कपिलवस्तु क्षेत्र नः २ का सांसद समेत रहेका गुप्ताले बिकासका काम गर्नु त परै जाओस आफनो मुख समेत नदेखाएकोमा मतदाताले गुनासो गरेका छन ।
५ बर्षको अवधिमा क्षेत्र नः २ को बिकासका लागी काम गर्न नसकेको बुद्धभुमी ७ का राम केवटले बताए ।
बारम्बार चुनाव जितेकाले केन्द्रमा राम्रो पहुँच तथा प्रभाव होला र बजेट ल्याएर बिकास गर्लान भन्ने सोचेर भोट हाल्यौँ बिकास त परै जाओस ५ बर्षमा एक पटक पनि गाउमा नआएको उनले बताए ।
त्यस्तै यशोधरा गाउँपालिका ५ का श्याम कुमार यादवले गुप्ताले आफनो स्वार्थ बाहेक क्षेत्रको बिकासका बारेमा चासो नदेखाएको आरोप लगाए । उनी भन्छन “कपिलवस्तुका ३ क्षेत्रमध्य केन्द्र सरकारबाट बृजेशले पहल नगर्दा सबैभन्दा कम बजेट आयो, अनि कसरी बिकास हुन्छ ? ” ।
चुनाव जितेर गएपछि क्षेत्रको बिकासमा उनले ध्याननै नदिएको यादवले बताए । त्यस्तै यशोधरा ३ का सुन्दरलाल त्रिपाठीले चुनाव जितेर गएपछि गुप्तालाई आफुले अहिलेसम्म नदेखेको बताए ।
गुप्ताको चुनावी इतिहास यस्तो छ ।
०६४ सालको मधेस आन्दोलन पश्चात एकाएक कपिलवस्तुमा मौलाउँदै गएका मधेस केन्द्रीत दलहरु १५ बर्ष नपुग्दै कमजोर बनेका छन् । मधेस केन्द्रीत दलको शक्तिमा ह्रास आएसंगै जिल्लाका चर्चित नेताहरु राष्ट्रिय पार्टीमा प्रवेश गर्न थालेका हुन् ।
यसै मध्येका पार्टी परिर्वतन गर्ने पछिल्ला नेता हुन् बृजेश कुमार गुप्ता पनि एक थिए । गुप्ता ०७४ सालमा एमाले नै प्रवेश नगरि सूर्य चुनाव चिह्न लिएर निर्वाचन लडेका थिए ।
उनी जिल्लाबाट पटक पटक निर्वाचित सांसद हुन् । ०५६ सालमा भएको संसदीय चुनावमा उनी राप्रपाबाट विजयी भएका थिए । उनका बुवा स्वर्गीय भगवानदास गुप्ता लामो समय राप्रपामा रहि राजनीति गर्दै आएका थिए । बुवाकै प्रभावको कारण ०५६ मा उनले हलोबाट चुनाव जितेका हुन् ।
०६४ सालमा मधेस आन्दोलनको प्रभाव कपिलवस्तुमा समेत पर्यो । त्यसको मौका छोपी गुप्ता पनि तत्कालिन तराई मधेस लोकतान्त्रिक पार्टी (तमलोपा) संग आवद्ध भए । यही पार्टीबाट उनले ०६४ को पहिलो संविधानसभाको चुनाव जिते । पहिलो संविधानसभा असफल भएपछि ०७० मा भएको दोस्रो संविधानसभाको चुनावमा पनि उनले तमलोपाबाट उठेर चुनाव जिते ।
संविधान जारीसंगै मधेस केन्द्रीत दलमा देखिएको मतभिन्नता, टुटफुटका कारण मधेस केन्द्रीत दलको प्रभाव जिल्लामा कम पर्न थाल्यो । स्थानीय तहको चुनाव बहिस्कारको नीति लिएको तत्कालिन तमलोपाको मुख्य घटक राष्ट्रिय जनता पार्टी (राजपा) प्रति उनको विमती थियो ।
हृदेश त्रिपाठीले नेतृत्व गरेको स्वतन्त्र समूहले एमालेसंग विभिन्न बुँदामा सहमती गरि सूर्य चिह्न लिएर उम्मेद्वार उठाएको थियो । त्यसैको फाइदा उठाउदै गुप्ता बामगठबन्धनबाट साझा उम्मेद्वार बन्न सफल भई चुनाव जित्न पुगेका हुन् ।
अहिले त्रिपाठीको स्वतन्त्र समूहले जनता प्रगतिशिल पार्टी खोल्न पुगेको छ । तर, गुप्ता त्यो पार्टीमा जान इच्छुक देखिएनन् । एमालेबाट चुनाव जिते पनि राजनीति रुपमा मौन जस्तै बन्दै आएका गुप्ता अन्ततः औपचारिक रुपमा एमाले प्रवेश गरेका छन् ।
उनका आलोचकहरु उनी चुनावी हिसाब किताब गरेरै एमाले प्रवेश गरेको बताउँछन् । आफ्नो प्रतिद्धन्द्धी दल कांग्रेस नै भएकाले उनले एमाले रोज्न पुगेको टिप्पणी उठ्न् छ । उत्तर, दक्षिण क्षेत्र ओगटेको संघीय निर्वाचन क्षेत्रमा राष्ट्रिय पार्टी विना चुनाव जित्न गाह्रो छ ।
माओवादी केन्द्र, एकीकृत समाजवादीको प्रभाव कमै रहेको यो क्षेत्रमा कांग्रेस बलियो शक्ति हो । यद्यपि गुप्ताका आफ्नै व्यक्तिगत भोट एमालेका भन्दा धेरै छन् । उत्तरमा एमालेको प्रभाव राम्रै हुनु र दक्षिणमा आफ्नै प्रभाव हुनुको कारण गुप्ताले एमाले रोज्न पुगेका हुन् ।
स्रोतका अनुसार गुप्ताले आफ्ना क्षेत्रमा आफ्नै नेता कार्यकर्तालाई स्थानीय तहमा टिकट दिनुपर्ने शर्तका साथ एमाले रोज्न पुगेका हुन् ।
यता हालै एमाले प्रवेश गरेका उनीबाट क्षेत्र नः २ का एमालेकै नेता तथा कार्यकता असन्तुष्ट देखिएका छन । एमालकै भोट पाएर सासंद भए तर केही काम नसक्दा साधारण एमाले कार्यकर्तादेखि नेताहरु असन्तुष्ट देखिएका छन ।
