कपिलवस्तु ।
तराई र मुलुकका विभिन्न भागमा हर्सोल्लासका साथ छठ पर्व मनाइएको छ। छठ मनाउनका लागि भक्तजनलाई सुविधा र सहज पूजा-आराधना गराउन पोखरी, नदी, खोला र खहरेहरू दुलही झैं सिँगारिएका छन् भने व्यवस्थित रूपमा घाट निर्माण गरिएका छन्। पछिल्लो समय छठ हिन्दुहरूको ‘साझा चाड’ मा रूपान्तरण हुँदै गएको छ। छठ पूजामा पहाडी, नेवार समुदायको समेत उल्लेख्य सहभागिता हुन थालेको छ।
कपिलवस्तुका नागरिक संवाददाता किरणमान बज्राचार्यका अनुसार अस्ताउँदो सूर्यलाई अर्घ्य दिँदै कपिलवस्तुमा हर्षोल्लासका साथ आइतबार छठ पर्व मनाइएको छ। कपिलवस्तु नगरपालिका १ चपरतल्लास्थित सझिीया घाटका रूपमा रहेको जमुहार नदी, बाणगंगा नदीको रामघाटम छठी माताको पूजाआजा गर्दै छठ पर्व मनाइएको हो। रामघाट र जमुहार नदीमा ५ हजार बढीले छठको सामूहिक पूजा गरेको पूजा व्यवस्थापन समितिले जनाएको छ।
यस्तै कृष्णनगर, बहादुरगन्ज लगायतका स्थानका पोखरीमा भक्तजनले सूर्यको पूजापाठ गरी सामूहिक रूपमा छठ पर्व मनाएका हुन्। यस वर्ष गत वर्षको तुलनामा भक्तजनको संख्या दोब्बर थियो। रामघाट नदीवारि र पारि दुवैतर्फ पूजाका लागि भक्तजनको भीड लागेको छ। यस वर्ष भक्तजनको संख्या बढेको पूजा व्यवस्थापन समितिका अध्यक्ष गणेशलाल कर्णले बताए। भक्तजन जम्मा भएर सामूहिक रूपमा पूजासमेत गरेका थिए। पूजाआजाका लागि मधेसी, पहाडी, नेवार समुदाय सहभागी थिए। विशेष पूजाका अवसरमा उनीहरूले सूर्य र छठी माताको आराधनासमेत गरेका थिए।
विराटनगर संवाददाता विनोद सुवेदीका अनुसार विराटनगरमा आइतबार अस्ताउँदो सूर्यलाई अर्घ्य दिई छठ पर्व मनाइएको छ। छठ पर्वका लागि विराटनगरका खोलाका घाट, नहर, पोखरी लगायतका स्थान सजाइएको छ। विराटनगरको सिंघिया नदीका घाट र किनारा सजाएर झकिझकाउ पारिएको थियो। यस्तै केशलिया नदी, विराटनगरका विभिन्न नहरहरू र पोखरीका डिल सजाइएका छन्।
