वैखरी अनलाइन, महाराजगञ्ज
हिउदे सभा अन्र्तगत कपिलवस्तुको महाराजगंज नगरपालिकाको १२ औँ
नगर सभा सुरु भएको छ । आगामी केही दिन सम्म चल्ने सभाले भु– उपयोग नीति सहीत बिभिन्न १७ वटा कार्यबिधि पास गर्नेछ ।
सभाको लुम्बिनी प्रदेश सदस्य नवराज लामिछानेले पानसमा दिप प्रज्जवलीत गर्दै उदघाटन गरेका थिए ।
उनले यस क्षेत्रमा हुनु पर्ने जति विकास नभएको भन्दै कृषि क्षेत्रमा जोड दिनु पर्ने बताए । उनले कृषि क्रान्ति नभई देशको विकास नहुने बताए । उनले अन्य क्षेत्र भन्दा बिशेषतः सिचाईमा लगानी गर्नू पर्ने बताए । मुलुक अहिले आर्थिक रुपमा संकट तर्फ उन्मुख भएको बेला आयात प्रतिस्थान गर्ने गरी उत्पादन बढाउनु पर्ने बताए ।
उनले छाडा चौपाया ब्यवस्थापनमा पहल भईरहेको बताए । सो अवसरमा नगरपालिकाका मेयर अब्दुल कलामले नगरपालिकाले शिक्षा, स्वास्थ्य र कृषि क्षेत्रमा जोड दिएको बताए ।
उनले नगरपालिकाको जुन सुकै वडामा भएको विकासलाई साझा विकासका रुपमा लिनु पर्ने बताए । उनले शिक्षाको गुणस्तर बढाउन सबै चनाखो हुनु पर्ने बताए । उनले महाराजगंज नगरपालिको विकासकालागि नगरपालिका प्रतिबद्ध रहेको बताए । उनले विकासमा सबैले हातेमालो गर्न आग्रह गरे । उनले बुद्धभुमी नगरपालिकाको गब्दाहावमा २ सय हेकटर क्षेत्रमा छाडा चौपाया ब्यवस्थापनकालागि पहल भईरहेको बताए ।
सो अवसरमा नगरपालिकाका प्रमुख प्रशाकीय अधिकृत रबिन्द्र प्रसाद चौधरीले चालु आर्थिक बर्षको हाल सम्म भएको प्रगति प्रस्तुत गर्दै ६८ अंक प्राप्त गरेको जानकारी दिए ।
उनले अहिले सम्म पुर्वाधारका ४७ मध्ये २५ वटा योजना ठेक्कामा भएको बताए । यस्तै उपाभोक्ता समिति मार्फत ५ वटा संझौता ४ वटा उपभोक्ता समिति गठन र ११ वडामा ६३ वटा उपभोक्ता समिति गठन भएका छन ।
चालु आर्थिक बर्षको हाल सम्म ६ करोड २१ लाख ४२ हजार ३७८ रुपैया सामाजिक सुरक्षा भक्ता बितरण गरिएको र आन्तरिक राजस्व १९ लाख ९८ हजार ९३७ रुपैया उठेको छ ।
सो अवसरमा वडा नम्बर १ का अध्यक्ष प्रमोद कुमार चौधरी, वडा नम्बर ५ का अध्यक्ष छेदीलाल कुर्मी, वडा नम्बर ९ का अध्यक्ष फरिद अहमद मुसलमान लगायतले नगरपालिकोको विकासमा सबैले साथ दिनु पर्नेमा जोड दिए । सभाको उदघाटन समारोह मेयर कलामको अध्यक्षता र बृजेश कुमार यादवको संचालनमा भएको थियो ।
सो अवसरमा गत मंसिरमा यसै क्षेत्रबाट प्रदेश सभामा निर्वाचित नवराज लामिछानेलाई दोसल्ला र कदर पत्रले सम्मानित समेत गरिएको थियो ।
