पाल्पा ।
सिद्धार्थ राजमार्गअन्तर्गत पाल्पाको सिद्धबाबा क्षेत्रमा पहिरो खसेर सडक अवरुद्ध भएको छ । निर्माणधीन सुरूङ मार्गको ‘टनेल पोर्टल’ मै पहिरो खसेको हो । गएरातिदेखि परेको अविरल वर्षासँगै झरेको पहिरोले तल्लो सिद्धबाबा क्षेत्रमा बन्दै गरेको टर्नेल पुरिएको स्थानीय विष्णुप्रसाद पाण्डेले जानकारी दिए ।
तल्लो सिद्धबाबा क्षेत्रमा निर्माण थालिएको टनेलमा पहिलो ठूलो क्षति पुगेको छ । आकार लिएको सुरूङमाथि पहिरो झरेको हो ।
सुरूङमार्गमा दैनिक ८० जना कामदारले काम गर्दै आएका छन् । पाल्पाको तिनाउ गाउँपालिका-३, सिद्धबाबा क्षेत्रमा सुरूङमार्ग निर्माण थालिएको थियो । पहिरोले सुरूङको टनेल पूरै पुरिदिएको आयोजनाले जनाएको छ ।
सिद्धार्थ राजमार्गको पाल्पा–बुटवल सडकको सिद्धबाबा क्षेत्रमा माथिबाट खस्ने पहिरोले बर्सेनि हिउँद र वर्षा जहिलेसुकै समस्या हुने गर्छ ।
