तिलोत्तमा ।
बुटवल उपमहानगरपालिकमा डेंगी नियन्त्रणका लागि खोज र नष्ट गर अभियान सञ्चालन हुने भएको छ । उपमहानगरपालिकामा बुधबार बसेको सरोकारवालासहितको बैठक तथा अन्तरक्रिया कार्यक्रमले बुधबारदेखि नै १९ वटै वडामा एकसाथ खोज र नष्ट गर अभियान सञ्चालन गर्ने निर्णयसहित सुरु गरिएको स्वास्थ्य शाखाका उपनिर्देशक युवराज पाण्डेले जानकारी दिए ।
विद्यालय, संघसंस्था, अस्पतालहरूलाई समेत सचेतना कार्यक्रममा सहभागी गराउँदै डेँगी नियन्त्रणको अभियानमा सहभागी गराउने निर्णय भएको उनले बताए । डेंगी महामारीको समयमा डेंगी परीक्षण शुल्कमा एकरुपता कायम राख्न बुटवलभित्रका प्रयोगशाला सहमत भएका छन्,’ उनले भने, ‘स्वास्थ्यसम्बन्धी निजी र सरकारी अस्पतालले डेंगीबारे सचेतना कार्यक्रम सञ्चालन गर्ने निर्णयसमेत भएको छ ।’
उनका अनुसार बुटवल उपमहानगरपालिकामा तत्काल डेंगीका संक्रमितको संख्या नबढिसकेकाले सचेतना कार्यक्रम सञ्चालन गर्ने र आवश्यकताअनुसार फिभर क्लिनिक सञ्चालन गर्नेसम्मको तयारी रहेको छ । १९ वटै वडामा अभियान सञ्चालन गर्ने गरी कार्ययोजना तयार गरेका छौं,’ उनले भने, ‘यो अभियान निरन्तर सञ्चालन हुन्छ र यसमा सबैको सहभागिता र सचेतना जरुरी हुन्छ ।’ यदि व्यक्ति सचेत भएन भने अभियान सञ्चालन गरेर मात्रै संक्रमण रोक्न नसकिने भएकाले पानी जम्न नदिन र लामखुट्टेको टोकाइबाट बच्न उनले सबैलाई आग्रह गरे ।
