चितवन ।
नेकपा माओवादीका महासचिव नेत्रविप्लव चन्द विप्लवका छोरा प्रकाश र मान्यता थापाबीचको गतहप्ता ‘जनवादी’ विवाह भयो । कपिलवस्तुस्थित पार्टी मुख्यालयमा गरिएको विवाहपछि भने ‘पूँजीवादी’ शैलीमा नै होटलमा भव्य रिसेप्सन पार्टी राखिएको थियो ।
तर, सो पार्टीकै क्रममा परम्परागतभन्दा पृथक तरिकाले एउटा प्रस्तुति राखिएको थियो, जसले त्यहाँको माहोल परिवर्तन गरिदियो । नवदुलही मान्यताले बनाएको एउटा मार्मिक भिडिओ उक्त पार्टीमा प्रदर्शन गरिएको थियो । दुवैतर्फका परिवार एउटै लहरमा बसेर भिडिओ हेर्दा एकाएक सन्नाटा र भावुकता छायो ।
‘एउटा सामान्य विद्यार्थी मान्यता थापाबाट एमबीबीएसको ऐतिहासिक आन्दोलनको महिला नेतृ डा. मान्यता थापामा हजुरले नै परिणत गर्नुभएको हो’, उनले भेनकी छन् ।
‘लाज लाग्यो…’ भन्दै मान्यताको आवाजमा भिडिओ सुरु हुँदा सबैजना मुस्कुराएका थिए । तर, जब मान्यताले आफ्नो दिवंगत बुबाको प्रसंग निकालिन्, सबैको अनुहारमा उदासी छाउन थाल्यो । बुबा अस्पतालको बेडमा मृत्युसँग संघर्ष गरिरहँदा प्रकाशले दिएको साथ र सहयोग, अनि बुबाले प्रकाशलाई छोराजस्तै ठानेको प्रसंग सुनाउँदा सबैका आँखा भरिए ।
उनले बुबा आफूसँग नभएपनि बुबाको आशीर्वादले प्रकाशको साथ पाएको बताउँदै भिडियोको अन्त्य गरेकी छन् । त्यतिबेला भिडियोमा उनको बुबाको तस्बिर पनि देख्न सकिन्छ । मान्यताको बुबा चिरञ्जीवी थापा शिक्षक थिए । श्रीमान–श्रीमती मिलेर चितवनमा सिर्जना ईंग्लिस स्कुल चलाउँथे । कोरोना भाइरसको कारण चिरञ्जीवीको निधन भएको थियो ।
बुहारीले पिताको बारेमा सुनाइरहँदा विप्लव र उनकी पत्नीले आँशु थाम्न सकेनन् । विप्लवले पटकपटक रुमालले आँशु पुछेका थिए । मान्यता पनि आफ्नै भिडिओ हेरेर भक्कानिएकी थिइन् ।
