लुम्बिनीमा पाँच हजारले एकैठाउँमा एक साता चक्र विज्ञान कार्यक्रमअन्तर्गत ध्यान गरेका छन्। जीवन विज्ञान नामक आध्यात्मिक संस्थाले आयोजना गरेको उक्त कार्यक्रम विश्वमै पहिलोपटक भएको आयोजकको दाबी छ। चैत १७ गतेदेखि सुरु भएको उक्त ध्यान शुक्रबार सम्पन्न हुँदै छ।
चक्र विज्ञानमा सहभागी हुन लुम्बिनी पुगेका सुनसरी हरिनगर गाउँपालिका–१ का अध्यक्ष प्रवीणप्रसाद गुप्ता अब क्रमशः वडाका झन्डै १० हजार बासिन्दालाई चक्र विज्ञानमार्फत ऊर्जावान् बनाउने बताउँछन्। ‘त्यसपछि सबै वडाका अध्यक्षसँग जीवन बदल्ने यो कलाबारे बताउँछु, बुझाउँछु र भन्छु आआफ्नो वडामा यो कार्यक्रम चलाएर जागरुक र ऊर्जावान् बनाऔं’, उनले भने, ‘रामदेव बाबाको योग टेलिभिजनमा हेरेर अलिअलि गर्थें, जीवन विज्ञान छ, नेपालमै यति राम्रो कार्यक्रम छ भन्ने थाहा थिएन।’
उनले जीवन स्वस्थ्य भएर बाँच्ने कला सिकेको बताए। भूमिसुधार तथा मालपोत कार्यालय भक्तपुरका लेखाअधिकृत हरिकृष्ण तिमिल्सिनाले चक्रको ज्ञान पाएपछि तिनलाई चलायमान गरे मानिस अनुशासित हुने बताए।
