तिलोत्तमा ।
रुपन्देहीमा १५ केजी २३० ग्राम (१५ पोका) अवैध लागूऔषध (गाँजा) बरामद भएको छ । सशस्त्र प्रहरी बल नेपाल प्रस्तावित सीमा सुरक्षा गुल्म डण्डा रुपन्देहीको मोबाइल गस्ती टोलीले सिद्धार्थनगर नगरपालिका १ स्थित नौडिहवाबाट गाँजा बरामद गरेको हो ।
शनिबार बिहान ६:४५ बजे बेवारिसे अवस्थामा झोलामा रहेको र्यापिङ सहितको गाँजा बरामद गरी आवश्यक कारबाहीका लागि जिल्ला प्रहरी कार्यालय भैरहवामा बुझाइएको सशस्त्र प्रहरी बल नेपाल नं. २७ गण हे.क्वा. रुपन्देहीका सशस्त्र प्रहरी नायव उपरीक्षक (डीएसपी) मोहन न्यौपानेले बताए ।
गत वैशाख ४ गते सशस्त्र प्रहरी बल नेपाल नं. २७ गण हे.क्वा. रुपन्देहीका प्रमुख सशस्त्र प्रहरी उपरीक्षक (एसपी) आनन्द थापामगरको कमाण्डमा खटिएको सीमा अनुगमन टोलीले रोहिणी गाउँपालिका १ मा भारतीय कन्टेनरबाट २७२.३३ केजी गाँजा बरामद गरेको थियो ।
