बुटवल ।
भैरहवा–लुम्बिनी सडक खण्ड अन्तर्गत वनगाईस्थित बेथरी पुल निर्माणको ठेक्का लगाएको एक दशक भए पनि अझैसम्म निर्माण सम्पन्न भएको छैन । २०७१ सालमा बेथरी पुल नामकरण गरी तिनाउ र डण्डा खोलाका दुई पुल निर्माण गर्न ठेक्का लगाइएको थियो ।
एक दशक बितिसक्दा पनि पुल निर्माणको काम पूरा नहुँदा भैरहवाबाट लुम्बिनी जाने र आउने यात्रीले सास्ती बेहोर्नुपरेको छ ।
तिनाउबाट डण्डासम्म ६ किलोमिटर दुरीमा पर्ने ती दुवै पुल साँघुरो भएपछि एकतर्फी सवारी चलाउनु परेको छ । सुरुमा काम गर्ने जिम्मा लिएको ठेकेदार कम्पनीले काम नगरेपछि २०७८ साल मंसिरमा नयाँ ठेक्का लगाउनुपरेको थियो । तर ठेकेदार कम्पनी परिवर्तन गरे पनि काम उस्तै सुस्त हुँदा यात्रुहरूलाई सास्ती भएको लुम्बिनी विकास कोषका कोषाध्यक्ष सिद्धिचरण भट्टराईले बताए ।
पप्पु बागमती जेभी कन्स्ट्रक्सनले बेथरीका दुई पुल निर्माणका लागि २०७१ असार २५ गते सम्झौता गरेको थियो । तर समयमै निर्माण सम्पन्न गर्न नगरेपछि रमण रियल होम ईन्फोटेक जेभी ललितपुरलाई जिम्मा दिएको हो । रमण रियल होम ईन्फोटेक जेभीसँग १० करोड रुपैयाँमा २०८० मंसिरमा निर्माण सक्ने गरी सम्झौता गरेको हो ।
ठेकेदारले विभिन्न समस्या देखाउँदै म्याद थप्न आग्रह गरेपछि २०८१ माघसम्म म्याद थपिएको उक्त पुल हेर्ने जिम्मा पाएको कपिलवस्तु हुलाकी सडक परियोजना सूचना अधिकारी इन्जिनियर पवित्रमणि आर्चायले बताए ।
