बुटवल ।
रुपन्देहीका कालिका मानव ज्ञान मावि र शान्ति नमुना माविले विद्यालय भर्ना लगायत सम्पूर्ण शैक्षिक गतिविधि अनिश्चितकालका लागि बन्द गरेका छन् ।
सरकारी विद्यालयका शिक्षक तथा कर्मचारीहरुको शैक्षिक हड्तालका लागि विद्यालय भर्ना लगायतका सबै कार्यक्रम बन्द गर्नु परेको ती विद्यालयले जारी गरेको सूचनामा उल्लेख छ ।
बुटवल उपमहानगरपालिका–१० रुपन्देहीस्थित कालिका मानवज्ञान माविका प्रधानाध्यापक दिनेश थापाले आज जारी गरेको सूचनामा लेखिएको छ, ‘हाल चलिरहेको शिक्षक महासंघको शिक्षक कर्मचारी आन्दोलनले सिर्जना गरेको शैक्षिक हड्तालको विसम परिस्थितिले गर्दा विद्यालयको पूर्वनिर्धारित भर्ना लगायतका सम्पूर्ण कार्यक्रमहरु शिक्षक कर्मचारी आन्दोलनलाई मध्यनजर गरी अर्को सूचना नआएसम्मलाई स्थगित गरिएको व्यहोरा सम्बन्धित सम्पूर्णमा सूचित गरिन्छ ।’
शिक्षा ऐन जारी नभएसम्म विद्यालय नफर्किने अडानसहित गत चैत २० गतेदेखि शिक्षक तथा कर्मचारीहरुले काठमाडौं केन्द्रित आन्दोलन गरिरहेका छन् । उनीहरुको शैक्षिक हड्तालका कारण विद्यालय भर्ना अभियान, एसईईको उत्तरपुस्तिका परीक्षण, वार्षिक परीक्षाको नतिजा प्रकाशन लगायतका शैक्षिक गतिविधि प्रभावित भएको छ ।
रुपन्देहीका कालिका मानवज्ञान मावि र शान्ति मावि नेपालमा सबैभन्दा धेरै विद्यार्थी अध्ययन गर्ने सरकारी विद्यालयको सूचीमा पर्दछन् । त्यहाँ करिब १२ हजार विद्यार्थीहरु अध्ययनरत छन् ।
