रुपन्देही ।
बुटवलको पुसे मेला आयोजना गर्न रुपन्देही उद्योग संघ र उद्योग व्यापार संघले हानथाप गरेका छन् । ०७८ सालमा भएको सहमतिलाई दुवै संस्थाले आफू अनुकूल व्याख्या गर्दै आउने पुसको पहिलो सातामा एकै ठाउँमा औद्योगिक प्रदर्शनी तथा व्यापार मेला आयोजना गर्ने मिति घोषणा गरेका छन् ।
गत पुसमै व्यापार संघले पत्रकार सम्मेलन गरेर मेला चलाउने घोषणा गरेको थियो । बुटवल मण्डपको गेटमा केही दिन अगाडि उद्योग व्यापार संघले मेलाको जानकारी दिने ब्यानर राखिसकेको छ ।
रुपन्देही उद्योग संघले यसअघि बुटवलका संघसंस्थाहरुबीच मेला सञ्चालन सम्बन्धमा गरिएको समझदारीअनुसार १६ औँ प्रदर्शनीका लागि शनिवार बोर्ड गाडेर औपचारिक सुरुवात गरेको हो । यसअघि संघको सचिवालय तथा कार्यसमिति बैठकबाट यसको निर्णय गरेर शनिवार औपचारिक रूपमा बुटवल रामनगरस्थित प्रदर्शनी गेटमा बोर्ड गाडेर यसको सुरुवात गरेको जनाएको छ ।
