पाकिस्तान तहरिक–ए–इन्साफ (पीटीआई) का सिनेटर खुर्रम जिशानले पूर्व प्रधानमन्त्री इमरान खानको मृत्यु भएको भन्ने अफवाहलाई पूर्णतः खारेज गर्दै उनी जीवित रहेको र हाल अदियाला जेलमै राखिएको बताएका छन्।
उनका अनुसार इमरान खानलाई पाकिस्तान छोड्न दबाब सिर्जना गर्ने रणनीतिअनुरूप एकान्तवासमा राखिएको छ।
पाकिस्तानबाट एएनआईसँग कुरा गर्दै पिटिआईका सिनेटर जिशानले इमरान खानको लोकप्रियताले वर्तमान शासन व्यवस्थालाई चुनौती दिइरहेको र यही कारणले उनको कुनै पनि तस्बिर वा भिडिो सार्वजनिक गर्न नदिइएको दाबी गरे।
उनले भने, ‘उहाँको प्रभाव र जनसमर्थनबाट डराएका कारण नै सत्ताधारीहरूले उहाँलाई पूर्ण रूपमा आइसोलेसनमा राखेका छन्।’
गत सातादेखि अफगानिस्तानका विभिन्न सामाजिक सञ्जाल खाताहरूमा रावलपिन्डीस्थित जेलभित्र इमरान खानको हत्या भएको दाबी फैलिएको थियो।
त्यही समयमा अदालतको निर्देशन हुँदाहुँदै पनि पाकिस्तानी अधिकारीहरूले उहाँका बहिनीहरूलाई गत एक महिनादेखि भेट्न नदिएको समाचारसँग उक्त अफवाह जोडिएको थियो, जसले थप शङ्का उत्पन्न गराएको थियो।
सिनेटर जिशानले भने, ‘उहाँलाई लगभग एक महिनादेखि एकान्तवासमा राखिएको छ । उहाँको परिवार, कानुन व्यवसायी तथा पिटिआई नेतृत्वलाई समेत भेट्न नदिइनु अत्यन्तै दुःखद र मानवीय अधिकारको स्पष्ट उल्लङ्घन हो । उहाँलाई कुनै न कुनै सम्झौताको दबाबमा ल्याउन खोजिएको जस्तो देखिन्छ।’
अफवाह अस्वीकार गर्दै उनले थपे, ‘पछिल्ला केही दिनमा हामीलाई आधिकारिक रूपमा आश्वासन दिइएको छ- इमरान खान जीवित हुनुहुन्छ, अदियाला जेलमै हुनुहुन्छ र उहाँको अवस्था स्थिर छ।’
पाकिस्तान सरकारले कस्तो प्रकारको सम्झौता गर्न खोजिरहेको छ भन्ने प्रश्नमा सिनेटर जिशानले भने, ‘उहाँलाई देश छोडेर विदेशमा चुपचाप बस्न भनिएको छ। यदि उहाँ देश बाहिर बस्न सहमत हुनुभयो भने छुट दिन सकिने सङ्केत दिइएको छ। तर इमरान खानले कहिल्यै यस्ता शर्तहरू स्वीकार गर्नुहुन्न। उहाँको राजनीतिक विश्वास र स्वभावले यस्तो सम्झौता सम्भव नै छैन।’
जेलमा भए पनि इमरान खानको प्रभाव घट्नुको सट्टा बढ्दै गएको सिनेटर जिशानको दाबी छ। उनले भने, ‘पिटिआईको जरो पाकिस्तानका युवाहरूमा अत्यन्त बलियो छ। इमरान खानको विचारधारा पुस्तौँ पुस्तासम्म प्रतिध्वनित हुन थालेको छ। कठिन परिस्थितिले असल नेतृत्वलाई अझ उजागर गरिरहेकाले पार्टीको भविष्य उज्ज्वल छ।’
इमरान खानको कुनै फोटो वा भिडिओ किन बाहिर नआएको भन्ने प्रश्नमा सिनेटर जिशानले भने, ‘सत्ताधारीहरूलाई थाहा छ- एउटा मात्रै तस्बिरले पनि विशाल जनसमर्थन उत्पन्न गर्न सक्छ। यही डरका कारण उहाँको कुनै दृश्य सार्वजनिक हुन दिइएको छैन।’ (रासस/एएनआई)
