नेपाली कांग्रेसका नेता डा. शेखर कोइरालाले १५औँ महाधिवेशन सर्न सक्ने बताएका छन्।
बुधबार आयोजित ‘किसुनजीको जीवन र व्यक्तित्व’ विषयक कार्यक्रममा बोल्दै डा. कोइरालाले क्रियाशील सदस्यता वितरणमा भएको ढिलाइले महाधिवेशन सर्न सक्ने बताएका हुन्। ‘अधिवेशन केही लम्बिन सक्छ,’ उनले भने, ‘मैले सार्न खोजेको होइन, म त पुस २६ गते हुनुपर्छ भन्ने व्यक्ति हो।’
क्रियाशील सदस्यता वितरणका लागि कांग्रेसले केन्द्रबाट पठाएका केही फारममा सिरियल नम्बर उल्लेख थिएन। त्यसलाई लिएर विवाद भएपछि सदस्यता वितरणमा ढिलाइ भएको थियो।
कांग्रेसका गाउँ तथा नगर समितिदेखि जिल्ला हुँदै प्रदेश कार्यसमितिको अधिवेशन भएपछि महाधिवेशन हुनेछ। कांग्रेसको १५औँ महाधिवेशन पुस २६ देखि २८ गतेसम्म गर्ने तय भएको छ।
