राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन)ले सुदूरपश्चिम भ्रमण पूरा गरेका छन् । शुक्रबार मात्रै उनी अछाम हुँदै कर्णाली प्रदेश प्रवेश गरेका छन् । ‘काठमाडौं फर्किन हतार छ’ भन्दै जुम्लाको कार्यक्रम स्थगित गरेका बालेनले शनिबार सुर्खेतमा र्याली निकालेका छन् ।
चार दिनको सुदूरपश्चिम भ्रमणमा बालेन मतदातासँग बोलेनन् । बालेनले प्रदेशका १६ वटै निर्वाचन क्षेत्र पुगेर आफ्ना पार्टीका लगभग सबै उम्मेदवारलाई भेटे । तर, रास्वपाबाट बाजुरामा उम्मेदवार रहेका हेमराज थापाले भने बालेन जिल्ला पुगेको पत्तै पाएनन् ।
‘प्रिय बालेन, तिमी बाजुरा आएको मैले दुई दिनपछि थाहा पाएँ,’ थापाले सामाजिक सञ्जालमा लेखेका छन्, ‘सञ्चार र सडकको पहुँचबाट टाढा रहेको मेरो जिल्लाको हिमाली पालिकाका हिउँले ढाकिएका घाँटीहरू छिचोल्दै गर्दा तिमी मेरो सचिवालय मार्तडिमा पुगेछौँ । म तिमीलाई स्वागत गर्न आउन सकिनँ । अहिले यो सन्देश म हुम्ला जिल्लाको मोबाइल नेटवर्कबाट लेख्दै छु । बालेन तिमी निकट भविष्यमा प्रधानमन्त्री बन्दै छौँ, अब मेरो जिल्लाका नागरिकले फेरि यस्तो दु:ख कहिल्यै भोग्न नपरोस् है ।’
हेमराजले बाजुरा अभाव नभएर अवसरको जिल्ला भएको पनि बताएका छन् ।
चुनावी अभियानका क्रममा बालेन बिहीबार बाजुरा पुगेका थिए । जिल्ला सदरमुकाम मार्तडीमा उनी ५ मिनेट मात्र बसे । शाहका लागि मार्तडीमा खानाको व्यवस्था गरिएको थियो । तर, उनी खानासमेत नखाएर फिर्ता भएका थिए । रास्वपा बाजुराका सभापति नवराज जैशी पनि बालेन पुग्दा मार्तडी थिएनन् ।
‘प्रतिनिधिसभा सदस्य उम्मेदवार हेमराज थापाज्यूसँगै म पनि हिमाली गाउँपालिका थिएँ,’ जैशीले भने, ‘उहाँ बाजुरा आउने टुङ्गो नभएकोले हामीले भेट्न पाएनौँ । उहाँ (बालेन) उम्मेदवारको सचिवालयमा पुगेर फर्किनुभएको हो ।’
बालेन बाजुरा पुग्दा उनलाई हेर्नेको ठूलो भिड लागेको थियो ।
