बुटवल। नेपाली कम्युनिस्ट पार्टी (नेकपा)का एक उम्मेदवारले नवलपरासीको सरकारी भवनमा सम्पर्क कार्यालय खोलिएको विषय बाहिर आएको छ ।
आयुर्वेद औषधालयका लागि नगरपालिकाले निर्माण गरेको भवनमा हाल एक महिला सहकारी बस्दै आएको छ । त्यसैको एक काेठामा बुढाथोकीले सम्पर्क कार्यालय खोलेकी थिइन् ।
सार्वजनिक भवनमा बुढाथोकीले सम्पर्क कार्यालय खोल्नु निर्वाचन आचारसंहिता विपरीत भएकोले त्यसलाई तत्काल हटाउन भनिएको आचारसंहिता अनुगमन अधिकृत एवं सहायक प्रमुख जिल्ला अधिकारी पोषनराज भण्डारीले रातोपाटीलाई बताए ।
उनले भने, ‘त्यो भवनको एक कोठामा उहाँहरूले सम्पर्क कार्यालय खुल्नु भएको रहेछ, त्यो आचार संहिता विपरीत रहेकोले हामीले तत्काल हटाउन निर्देशन दिएका छौँ । अब केही समयमा हट्छ होला ।’
बुढाथोकीसँग कुराकानी गर्न खोज्दा स्थानीय पार्टीको इन्चार्जसँग बुझ्न अनुरोध गरिन्।
नवलपरासी जिल्लामा अहिलेसम्म १० वटा आचारसंहिता उल्लङ्घनका उजुरी दर्ता भएका छन् । दुई निर्वाचन क्षेत्र रहेको जिल्लामा २३ स्वतन्त्रसहित ५५ जना उम्मेदवार चुनावी प्रतिस्पर्धामा छन्।
