दाङ — राप्ती स्वास्थ्य विज्ञान प्रतिष्ठान घोराहीले पश्चिम नेपालको थारु समुदायमा जनस्वास्थ्य समस्याका रूपमा रहेको ‘सिकलसेल एनिमिया’को बृहत् परीक्षण सुरु गरेको छ ।
प्रतिष्ठानमा निशुल्क परीक्षण यसअघि नै सुरु गरिसकिएकोमा यसपटक पालिकास्तरमा पनि परीक्षण सन्चालन गरिएको छ ।
प्रतिष्ठानले पहिलो चरणमा ५ हजार जनाको निःशुल्क परीक्षण गर्ने तयारी अनुसार बुधबार राप्ती आधारभूत अस्पताल सिसहनियामा परीक्षण सुरु गरिएको हो । परीक्षणमा ५ सय बढीको जाँच गरिएको प्रतिष्ठानका निमित्त अस्पताल निर्देशक प्राडा जनार्दन पन्थीले जानकारी दिए । शिविरमा २ सय ३५ पुरुष र ३ सय २८ महिला गरी ५ सय ६३ जना लाभान्वित भएको उनले बताए ।
उनका अनुसार यसअघि अस्पतालमा मात्रै ३ सय २० जनाले जाँच गराएका थिए । शिविरमा डिन, डाईरेक्टर, २ जना फिजिसियन चिकित्सक, ४ जना नर्स, ६ ल्याब टेक्निसियन, ४ बिएनएस विद्यार्थी, १ नर्सिङ लेक्चरर र १ सेक्सन अफिसरको सहभागिता थियो ।
प्रतिष्ठानमा सिकलसेल परीक्षणका लागि अत्याधुनिक मेसिन जडान भएसँगै दाङभरी अभियान थालिएको प्रतिष्ठानका निमित्त उपकुलपति प्रा. श्याम लम्सालले बताए ।
यो आर्थिक वर्षमा ५ हजार र आगामी आर्थिक वर्ष २०८३/ ०८४ मा १० हजारको परीक्षण गर्ने लक्ष्य रहेको उनले बताए । दाङ जिल्लाका सबै जोखिममा रहेका सर्वसाधारणको परीक्षणका साथै अनुसन्धान पनि गरिने लम्सालले बताए ।
