भारतमा मेडिकल प्रवेश परीक्षा निटको पेपर बाहिरिएको प्रकरणलाई लिएर शुरु भएको विद्यार्थी आन्दोलन अझै सकिएको छैन । शिक्षा प्रणाली सुधार, दोषीमाथि कारबाही र केन्द्रीय शिक्षा मन्त्री धर्मेन्द्र प्रधानको राजीनामाको माग गर्दै विद्यार्थीहरू लामो समयदेखि केन्द्रीय राजधानी नयाँदिल्लीको जंतर–मंतरमा आन्दोलन गरिरहेका छन् ।
यही आन्दोलनलाई समर्थन गर्दै २६ दिनदेखि आमरण अनशनमा बसेका चर्चित सामाजिक अभियन्ता सोनम वाङचुकले अन्ततः हिजो आफ्नो अनशन तोड्नुभएको छ । भारतका केन्द्रीय मन्त्री जेपी नड्डा र डाक्टर जितेन्द्र सिंह, साथै लद्दाख एपेक्स बडीका प्रतिनिधिहरूको उपस्थितिमा उहाँले अनशन अन्त्य गर्नुभएको बीबीसी हिन्दीले जनाएको छ ।
देशमा सम्भावित हिंसा रोक्नुपर्ने आवश्यकतालाई ध्यानमा राख्दै अनशन अन्त्य गरेको उहाँको भनाइ छ । अनशन तोड्दै उहाँले आन्दोलनकारी र सर्वसाधारणलाई कुनै पनि प्रकारको हिंसामा नउत्रिन आग्रह गर्नुभएको छ । भारत सरकारसँग भएका सहमति र सर्तबारे भने उहाँले छिट्टै विस्तृत जानकारी सार्वजनिक गर्ने समेत बताउनु भएको छ ।
शैक्षिक सुधारको माग गर्दै विद्यार्थी संगठनहरूले आन्दोलनलाई निरन्तरता दिएका छन् । उनीहरूले परीक्षाको विश्वसनीयता कायम गर्न, दोषीमाथि कडा कारबाही गर्न, परीक्षा प्रणालीमा सुधार तथा शिक्षा मन्त्री धर्मेन्द्र प्रधानको राजीनामाको माग दोहोर्याइरहेका छन् ।
पछिल्लो केही दिनयता दिल्लीमा प्रदर्शन, धर्ना र विरोधसभाहरू चलिरहेका छन् । आन्दोलनको आगामी दिशा सरकार र आन्दोलनकारीबीच हुने थप वार्ताको परिणाममा निर्भर हुने अनुमान छ ।
आन्दोलनलाई देशव्यापी बनाउन कक्रोच जनता पार्टी (सीजेपी) ले आज भारतभर शान्तिपूर्ण प्रदर्शन गर्न आह्वान गरेको छ ।
यसैबीच प्रधानमन्त्री नरेन्द्र मोदीले प्रश्नपत्र चुहावटमा संलग्नलाई कडा सजाय दिलाउन ‘फास्ट ट्र्याक’ अदालत स्थापना गर्ने घोषणा गर्नुभएको छ ।
तर सीजेपीका संस्थापक अभिजीत दीपके, कंग्रेस नेता राहुल गान्धी र आम आदमी पार्टीका अरविन्द केजरीवालसहितका प्रमुख विपक्षी नेताहरूले प्रधानमन्त्रीको घोषणा ध्यान मोड्ने प्रयास मात्र भएको भन्दै शिक्षामन्त्री धर्मेन्द्र प्रधानको तत्काल राजीनामा मागेका छन् ।
विद्यार्थी आन्दोलन तिव्र बन्दै जाँदा बस, ट्याक्सी र रेल सेवाम प्रभावित भएको छ । शैक्षिक गतिविधि अवरुद्ध छन् भने हिंसात्मक घटना हुने चिन्ता बढेको छ ।
