गुल्मी — भौतिक पूर्वाधार तथा यातायात मन्त्री सुनिल लम्सालले गुल्मी अस्पतालको भवन निर्माणमा चरम ढिलासुस्तीका कारण ठेक्का तोड्न ठाडो निर्देशन दिएका छन् । आइतबार गुल्मी सदरमुकाम तम्घासमा निर्माणाधीन गुल्मी अस्पताल भवनको मन्त्री लम्सालले अनुगमन गरेका हुन् ।
दुई वर्षमा निर्माण सक्ने गरी सम्झौता भए पनि पाँच वर्ष बित्दासमेत गुल्मी अस्पतालको निर्माणाधीन भवनले पूर्णता पाउन सकेको छैन । निर्माणाधीन भवनको हालसम्मको कामको जानकारी लिँदै भौतिक पूर्वाधार तथा यातायात मन्त्री लम्सालले ठेक्का तोड्न ठाडो निर्देशन दिए । ‘काम गर्छु त भनिहाल्छ, गरेको छ कि छैन भन्ने कुरा हो,’ उनले भने, ‘ठेक्का रद्द गरिहाल्नू, बाँकी बजेटले ठेक्का लगाएर काम गरिहालौं ।’ साथमै रहेका गुल्मी-१ बाट निर्वाचित सांसद सागर ढकालले पनि ठेक्का तोडेर काम अगाडि बढाउनुपर्नेमा सहमति जनाउँदै सोहीअनुरुप गर्नुपर्ने बताए ।
गुल्मी अस्पताल भवन निर्माणको जिम्मा स्वच्छन्द/बानियाँ जेभी मकवानपुरले लिएको छ । जुन कम्पनी नेपाली कांग्रेसका नेता तथा बागमती प्रदेशका मुख्यमन्त्री इन्द्रबहादुर बानियाँको हो । तर, मन्त्री लम्साल ठेक्काको जिम्मा लिएर दुई वर्षमा गर्नुपर्ने काम पाँच वर्ष पूरै बित्दासमेत नगर्ने निर्माण व्यवसायीलाई हर्जाना लगाएर काम गराएरै छाड्नुपर्नेतर्फ भने केही बोलेनन् ।
फिनिसिङको मात्रै काम बाँकी रहेको भूकम्प प्रतिरोधी पाँच तलाको गुल्मी अस्पताल भवन लिफ्टसहितको अपाङ्गमैत्री रहेको छ । दातृनिकायका तर्फबाट पीएमसी कन्सल्टेन्ट सीएसआईआरमार्फत काम रेखदेख भइरहेको छ । यो भारत सरकारको पूर्ण सहयोगमा निर्माण भइरहेको छ ।
