वैखरी अनलाइन, कपिलवस्तु ।
कपिलवस्तुस्थित ऐतिहासिक तथा धार्मिक महत्व बोकेको थाई मन्दिर, तिलौराकोटमा बर्खाबासको पावन अवसरमा सोमबार १७ जना थाई भिक्षुहरूलाई भोजन तथा मिठाई दान गरिएको छ।
बौद्ध धर्मावलम्बीहरूका लागि विशेष धार्मिक महत्व राख्ने बर्खाबासको अवसर पारेर गरिएको उक्त भोजनदान कार्यक्रम श्रद्धा, करुणा, मैत्री तथा सेवाभावलाई व्यवहारमा उतार्ने उद्देश्यसहित आयोजना गरिएको हो।
उक्त पुण्यकार्यमा लुम्बिनी विकास कोषका निवर्तमान कार्यकारिणी सदस्य राजेश ज्ञवाली तथा उहाँका दुई छोरी आरोग्य ज्ञवाली र आरोही ज्ञवाली सहभागी भई थाई मन्दिरमा रहेका १७ जना थाई भिक्षुहरूलाई श्रद्धापूर्वक भोजन तथा मिठाई दान गर्नुभएको थियो।
बौद्ध परम्परामा बर्खाबासको समयमा भिक्षुहरू एकै स्थानमा बसेर ध्यान, साधना, अध्ययन तथा धार्मिक गतिविधिमा समय बिताउने प्रचलन रहेको छ। यस अवधिमा भिक्षु तथा संघलाई भोजन, वस्त्रलगायतका आवश्यक सामग्री दान गर्ने परम्परालाई पुण्यकार्यका रूपमा लिइन्छ।
भोजनदान कार्यक्रममा सहभागी ज्ञवाली परिवारले बुद्धका उपदेशमा आधारित करुणा, मैत्री, अहिंसा, सेवा र परोपकारको भावनालाई आत्मसात् गर्दै भिक्षुहरूलाई भोजन तथा मिठाई दान गरेको जनाएको छ।
तिलौराकोटमा रहेको थाई मन्दिर बौद्ध धर्मावलम्बी तथा पर्यटकका लागि समेत महत्वपूर्ण धार्मिक गन्तव्यका रूपमा रहेको छ। भगवान् गौतम बुद्धको जीवनसँग प्रत्यक्ष सम्बन्ध रहेको कपिलवस्तुको तिलौराकोट क्षेत्रमा विभिन्न देशका बौद्ध धर्मावलम्बी तथा भिक्षुहरूको धार्मिक गतिविधि हुँदै आएको छ।
नेपाल र थाइल्यान्डबीचको धार्मिक तथा सांस्कृतिक सम्बन्धलाई समेत यस्ता कार्यक्रमले थप मजबुत बनाउने विश्वास गरिएको छ। विशेषगरी बौद्ध धर्मसँग जोडिएका धार्मिक गतिविधि, पूजाआजा, ध्यान तथा दान–पुण्यका कार्यक्रमले दुई देशबीचको ऐतिहासिक धार्मिक सम्बन्धलाई निरन्तरता दिन सहयोग पुर्याउने बताइएको छ।
भोजनदान तथा मिठाई दानजस्ता कार्यक्रमले धार्मिक आस्थासँगै समाजमा परोपकार, सहयोग, सद्भाव र मानवीय सेवाको भावना विकास गर्न महत्वपूर्ण भूमिका खेल्ने विश्वास गरिएको छ।
बर्खाबासको अवसरमा गरिएको यस पुण्यकार्यले भिक्षुहरूप्रति श्रद्धा व्यक्त गर्नुका साथै बुद्धका शिक्षालाई दैनिक जीवनमा व्यवहारमा उतार्ने सन्देशसमेत दिएको छ। साथै, तिलौराकोटमा रहेका बौद्ध सम्पदा र धार्मिक गतिविधिको संरक्षण तथा प्रवर्द्धनमा स्थानीयस्तरबाट हुने यस्ता पहलले सकारात्मक योगदान पुर्याउने अपेक्षा गरिएको छ।
