काठमाण्डौ – बागलुङमा पहिरोमा परी ज्यान गुमाउनेको सङ्ख्या १२ जना पुगेको छ ।
गएको शुक्रबार, शनिबार र आइतबार परेको निरन्तरको वर्षाबाट बागलुङका विभिन्न ठाउँमा पहिरोले घर पुरिँदा ज्यान गुमाउनेको संख्या १२ पुगेको हो । एक जनाको अवस्था अझै थाहा हुन सकेको छैन ।
पछिल्लो पटक ताराखोला गाउँपालिका–५ सिपमा पहिरोले घर पुरिँदा दुई जना ५५ वर्षीय दिलबहादुर पुन र उहाँकी सासु म्याग्दीको मालिका गाउँपालिका–२ की ७९ वर्षीय नरमाया रोकाको ज्यान गएको प्रहरी उपरीक्षक फणीन्द्र प्रसाईँले जानकारी दिनुभयो । सिपमा पहिरोबाट पुन र रोकाको ज्यान गएको खबर ढिला गरी प्राप्त भएको हो ।
त्यस्तै शनिबार ताराखोलामै एक जनाको ज्यान गएको थियो भने आइतबार तमानखोला गाउँपालिकामा चार जना र निसीखोला गाउँपालिकामा पाँच जनाले ज्यान गुमाएका थिए । तमानखोला गाउँपालिकामा एक जना बेपत्ता रहेका छन् । बेपत्ताको खोजी भैरहेको जिल्ला प्रहरी कार्यालय बागलुङले जनाएको छ ।
