परासी– लुम्बिनी प्रदेशका मुख्यमन्त्री चेतनारायण आचार्यले जेनजीको आन्दोलनका कारण पश्चिम नवलपरासी जिल्लामा प्रभावित भएका सरकारी कार्यालय, व्यवसायिक भवन तथा निजी घरहरूको अनुगमन गरेका छन् । शुक्रबार उनले अनुगमन गर्दै उच्च मनोबलसाथ काम गर्न आग्रह गरे ।
जेनजीहरूले सरकारी, सार्वजनिक तथा निजी सम्पत्तिमाथि तोडफोड, आगजनी र लुटपाट नगरेको स्पष्ट गर्दै मुख्यमन्त्री आचार्यले जेनजीको नाममा आपराधिक समूहहरूले त्यसको लाभ उठाएको ठहर गरे ।
विभिन्न कार्यालयहरूको अनुगमनपछि सञ्चारकर्मीहरूसँग कुरा गर्दै उनले सार्वजनिक, सरकारी तथा निजी सम्पत्तिमा तोडफोड, आगजनी र लुटपाटमा संलग्नको पहिचान गरी कानुनी कारबाहीको दायरामा ल्याउन संघीय सरकारसँग माग गरे ।
‘जेनजीहरूले मुलुकमा सुशासन कायम गर्दै भ्रष्टाचारको अन्त्य चाहेका हुन् । उनीहरूको प्रमुख मुद्दा यिनै थिए । तर, जुन प्रकारले अराजकता फैलाउने काम भयो, त्यो जेनजीको भावना विपरीतको कार्य हो’, उनले भने, ‘यो जुन ध्वंश पार्ने काम गरिएको छ, गराइएको छ, यसप्रति घोर आपत्ति छ ।’
मुख्यमन्त्री आचार्यले जनताको काम टेन्टमुनि बसेर भए पनि गर्ने विश्वास दिलाए । ‘टेन्टमुनि बसेर भए पनि जनताको काम गर्छौं । कर्मचारीहरूलाई मनोबल उच्च बनाएर काम खट्न भनिसकेका छौं । उहाँहरूले काम थालनी गर्नुभएको छ’, मुख्यमन्त्री आचार्यले भने, ‘पूर्ण रूपमा ध्वस्त भएका कार्यालयहरूबाट सेवा सुचारु गर्न प्रदेश सरकारले सहयोग गर्ने निर्णय पनि गरिसकेको छ ।’
