तिलोत्तमा — रूपन्देहीको रोहिणी गाउँपालिकाका स्थानीयलाई लालपुर्जा वितरण गरिएको छ । पालिकाको वडा नम्बर ६ मा आइतबार एक कार्यक्रमका बीच ५ सय ५० जना स्थानीयलाई पुर्जा वितरण गरिएको हो ।
स्थानीयसँग पुर्जा प्रमाण नहुँदा समस्या भएको पालिकाका अध्यक्ष विद्याप्रसाद यादवले बताए । उनले नागरिकले आफ्नो जग्गा हो भन्न पाउनु नै उनीहरूका लागि खुसीको विषय भएको बताए ।
‘गत वर्ष ४ सय ५० जनालाई बाँडेका थियौं,’ उनले भने, ‘यसपटक ठूलो प्रयासपछि स्थानीयले जग्गाधनी पुर्जा पाए । यसले उनीहरूका सन्ततिलाई समेत सहज हुनेछ ।’
नापी कार्यालय रूपन्देहीका प्रमुख नापी अधिकृत मणिप्रसाद रेग्मीले जग्गाधनी प्रमाणपुर्जा क्रमश: सबै वडामा वितरण गरिने बताए । उनले नागरिकले आफ्नो भनेर जोतभोग गरिरहेको जमिन कानुनत: आफ्नो बनाउन पाउँदा उनीहरूमा देखिने खुसीले सकारात्मक भाव छोड्ने बताए ।
