तस्बिर : एजेन्सी
संयुक्त राष्ट्रसङ्घीय शरणार्थी उच्चायुक्त (यूएनएचसीआर)ले जलवायु परिवर्तनको कारण विश्वभर लाखौं मानिसहरु विस्थापित भएको पुष्टि गरेको छ । ब्राजिलमा ३०औँ संयुक्त राष्ट्र जलवायु परिवर्तन सम्मेलन अर्थात् कोप–३० हुनु अघि जारी गरिएको एक प्रतिवेदनमा यूएनएचसीआरले वितेको एक दशकमा मौसमसम्बन्धी प्रकोपहरूले झन्डै २५ करोड आन्तरिक विस्थापनहरू निम्त्याएको जनाएको छ ।
दक्षिण सुडान र ब्राजिलमा बाढी, केन्या र पाकिस्तानमा रेकर्ड तोड्ने तापक्रम तथा चाड र इथियोपियामा पानीको अभावलाई उद्धृत गर्दै द्वन्द्वबाट विस्थापित तीन चौथाई मानिसहरू मुख्यतः जलवायु परिवर्तनको प्रभावको जोखिममा रहेको भनिएको छ । प्रतिवेदनले जलवायु परिवर्तनले विस्थापित समुदायहरू र द्वन्द्व प्रभावितहरूलाई तुलनात्मक रूपमा धेरै समस्या सामना गर्नुपर्ने जटिलता बढाइ दिएको जनाएको छ ।
ब्राजिलको अमेजन वर्षावनमा रहेको बेलेम शहरमा हुने दुई हप्ताको वार्ताका लागि एक सय ९० भन्दा बढी देशका झन्डै ५० हजार सहभागीहरू भेला भइरहेका छन् । उनीहरूले जलवायु सङ्कट र यसका विनाशकारी प्रभावहरूलाई कसरी नियन्त्रण गर्ने भन्ने बारे छलफल गर्नेछन् ।
