घनश्याम भर
(विजयनगर) कपिलवस्तु, १६ असार ।
कपिलवस्तुको विजयनगर गाउँपालिकाको दोस्रो गाउँसभाको नवौँ अधिवेशनबाट आर्थिक वर्ष २०८३/८४ का लागि प्रस्तावित नीति, कार्यक्रम तथा बजेट सर्वसम्मत रूपमा पारित गरिएको छ ।
गाउँपालिकाले असार ९ गते प्रस्तुत गरेको ६८ करोड ११ लाख ७८ हजार ६ सय रुपैयाँ बराबरको बजेटमाथि विस्तृत छलफलपछि मंगलबार बसेको दोस्रो बैठकले सर्वसम्मत रूपमा स्वीकृत गरेको हो । पारित बजेटमध्ये चालुतर्फ ४९ करोड ९९ लाख ३७ हजार रुपैयाँ (७३.४० प्रतिशत) तथा पुँजीगततर्फ १८ करोड १२ लाख ४१ हजार ६ सय रुपैयाँ (२६.६० प्रतिशत) विनियोजन गरिएको छ ।
पारित नीति तथा कार्यक्रममा कृषि उत्पादन वृद्धि, गुणस्तरीय शिक्षा, आधारभूत स्वास्थ्य सेवा विस्तार, सिँचाइ विकास, पूर्वाधार निर्माण, रोजगार सिर्जना, सामाजिक सुरक्षा, खानेपानी तथा सरसफाइ, सुशासन प्रवर्द्धन र गरिबी न्यूनीकरणलाई प्राथमिकतामा राखिएको छ । साथै कृषि क्षेत्रको आधुनिकीकरण तथा व्यवसायीकरण, सडक सञ्जाल विस्तार, प्रविधिको विकास, सार्वजनिक सेवामा नागरिकको सहज पहुँच तथा मौलिक सांस्कृतिक सम्पदाको संरक्षण र प्रवर्द्धन गर्ने नीति अवलम्बन गरिएको गाउँपालिकाले जनाएको छ ।
गाउँपालिका अध्यक्ष गोपाल बहादुर थापाले सीमित स्रोत-साधनको प्रभावकारी उपयोग गर्दै नागरिकको जीवनस्तर सुधार गर्ने लक्ष्यका साथ नीति तथा कार्यक्रम ल्याइएको बताए । उनले कृषि, शिक्षा, स्वास्थ्य र पूर्वाधार विकासलाई केन्द्रमा राखेर समृद्ध विजयनगर निर्माणको अभियानलाई अगाडि बढाइने उल्लेख गरे ।
उपाध्यक्ष लक्ष्मी कुमारी चौधरीले बजेट तथा कार्यक्रम समावेशी, जनमुखी र परिणाममुखी रहेको बताउँदै महिला, बालबालिका, किसान तथा विपन्न समुदायको हितलाई विशेष प्राथमिकता दिइएको जानकारी दिइन् ।
प्रमुख प्रशासकीय अधिकृत हिमलाल विश्वकर्माले वित्तीय अनुशासन, पारदर्शिता र प्रभावकारी कार्यान्वयनमा गाउँपालिका प्रतिबद्ध रहेको बताउँदै स्वीकृत कार्यक्रम समयमै सम्पन्न गर्न प्रशासनिक संयन्त्र सक्रिय रहने बताए ।
गाउँसभाबाट आर्थिक विधेयक २०८३/८४ र विनियोजन विधेयक २०८३/८४ समेत सर्वसम्मत रूपमा पारित गरिएको छ । गाउँपालिकाले पारित नीति, कार्यक्रम तथा बजेट कार्यान्वयनमार्फत समृद्ध, आत्मनिर्भर र विकासमुखी विजयनगर निर्माणमा योगदान पुग्ने विश्वास व्यक्त गरेको छ ।
