वाणगंगामा एक वर्षमा १ हजार ३८२ जन्म, ५९४ जनाको मृत्यु, ८ न. वडा धेरै सूचकमा अघि

कपिलवस्तु।

वाणगंगा नगरपालिकामा पछिल्लो एक आर्थिक वर्षमा जन्मभन्दा मृत्युको संख्या कम भए पनि व्यक्तिगत घटना दर्ताको अभिलेखमा जन्मदर तुलनात्मक रूपमा न्यून देखिएको छ। नगरपालिकाको पञ्जिकाधिकारी शाखाका अनुसार आर्थिक वर्ष २०८२/८३ मा नगरभित्र १ हजार ३ सय ८२ जना शिशुको जन्म दर्ता भएको छ।

स्थानीय पञ्जिकाधिकारीको कार्यालय वाणगंगाका अनुसार २०८२ साउन १ गतेदेखि २०८३ असार ३२ गतेसम्म नगरपालिकाका सबै वडामा दर्ता भएका व्यक्तिगत घटनाको विवरणअनुसार जन्म दर्ता भएकामध्ये ७ सय पुरुष र ६ सय ८२ महिला छन्।

पञ्जिकाधिकारी शाखा प्रमुख दीपक पाण्डेका अनुसार समग्र व्यक्तिगत घटना दर्ताको अभिलेख हेर्दा नगरपालिकामा जन्मदर न्यून देखिएको छ। नगरपालिकाको जनसंख्या र व्यक्तिगत घटना दर्ताको पछिल्लो विवरणलाई हेर्दा जन्मदरमा कमी आएको देखिएको उनको भनाइ छ।

मृत्यु र सम्बन्ध विच्छेद पनि उल्लेख्य

एक आर्थिक वर्षमा वाणगंगा नगरपालिकाभित्र ५ सय ९४ जनाको मृत्यु दर्ता भएको छ। मृत्यु हुनेमध्ये ३ सय ४९ पुरुष र २ सय ४५ महिला रहेका छन्। यी विभिन्न उमेर समूहका रहेका छन् ।

यसैगरी, श्रीमान्–श्रीमतीबीच सम्बन्ध विच्छेदका १ सय १५ वटा घटना दर्ता भएका छन्। सो अवधिमा ७ सय २८ जनाको विवाह दर्ता भएको नगरपालिकाको अभिलेखमा उल्लेख छ।

नगरपालिकामा बसाइँसराइको संख्या भने उल्लेख्य देखिएको छ। एक वर्षको अवधिमा वाणगंगामा अन्य स्थानबाट बसाइँ सरी आउनेको संख्या १ हजार ६ सय ७५ रहेको छ भने वाणगंगा छाडेर अन्यत्र बसाइँ सरी जानेको संख्या ३ सय ७० रहेको छ।

वडा नं. ८ मा सबैभन्दा बढी बसाइँसराइ

वडागत विवरणअनुसार वाणगंगा नगरपालिका–८ मा सबैभन्दा बढी मानिस बसाइँ सरी आएका छन्। उक्त वडामा एक वर्षमा ३ सय ८१ जना बसाइँ सरी आएका छन्। त्यस्तै, सोही वडाबाट अन्यत्र बसाइँ सरी जानेको संख्या भने तुलनात्मक रूपमा न्यून रहेको छ। वडा नं. ८ बाट १७ जना अन्यत्र बसाइँ सरेका छन्।

जन्म दर्ताको विवरणअनुसार नगरपालिकामा सबैभन्दा कम जन्म वडा नं. ३ मा भएको छ। सबैभन्दा बढी जन्म दर्ता भने वडा नं. ८ मा भएको नगरपालिकाले जनाएको छ। सम्बन्ध विच्छेदका घटना पनि वडा नं. ८ मै सबैभन्दा बढी दर्ता भएका छन्।

२०७८ को जनगणनाअनुसार वाणगंगाको जनसंख्या ९६ हजार ७१४

राष्ट्रिय जनगणना २०७८ अनुसार वाणगंगा नगरपालिकाको कुल जनसंख्या ९६ हजार ७ सय १४ रहेको छ। जसमध्ये महिला ५१ हजार ३ सय ७ र पुरुष ४५ हजार ४ सय ७ जना रहेका छन्। २०८४ सम्ममा याे जनसंख्यामा केही बढेकाे छ । वाणगंगा नगरपालिकामा थारु, ब्राह्मण, क्षेत्री, गुरुङ, मगर, दलित, यादव र मुस्लिमलगायत विभिन्न जातजातिको बसोबास रहेको छ।

जन्म, मृत्यु, विवाह, सम्बन्ध विच्छेद र बसाइँसराइ गरी पाँच प्रकारका घटना व्यक्तिगत घटना दर्ताअन्तर्गत पर्दछन्। नगरपालिकाको पछिल्लो अभिलेखले जन्मदर, मृत्यु, वैवाहिक सम्बन्ध, सम्बन्ध विच्छेद तथा जनसंख्याको बसाइँसराइसम्बन्धी चेतनामुलक कार्यक्रम तथा प्रचार प्रसार भने कमी भएकाे देखिन्छ ।