लुम्बिनीमा ७८ दिनमा मनसुनजन्य विपद्‌बाट ८५ जनाको मृत्यु

बुटवल — लुम्बिनी प्रदेशमा ७८ दिनको अवधिमा ९१ वटा विपद्का घटना भएका छन् । ती घटनाबाट ८५ जनाको मृत्यु, १३ घाइते र दुई जना बेपत्ता भएका छन् । लुम्बिनी प्रदेशको रोल्पामा मात्र विपद्बाट २० जनाको मृत्यु भएको छ ।

बाढीका चार, चट्याङका सात, पहिरोका १० तथा अधिक वर्षाका कारण ६ वटा घटना भएका छन् । यो अवधिमा पानीमा डुबेर मात्र ५८ जनाको मृत्यु भएको छ । बाढीमा परेर ४, चट्याङमा परेर ३, पहिरोमा परेर २० जनाको मृत्यु भएको छ ।

रोल्पामा यस वर्षको मनसुनजन्य विपद्का घटनाबाट चार स्थानीय तहमा २० जनाको मृत्यु भएको छ । थवाङमा मात्रै १२ जनाको मृत्यु भएको छ भने एक जना बेपत्ता र दुई जना घाइते भएका छन् । सुनछहरी गाउँपालिकामा ६ जनाको मृत्यु भएको छ । लुङ्ग्री र परिवर्तन गाउँपालिकामा एक–एक जनाको मृत्यु भएको तथ्यांकमा उल्लेख छ । चार स्थानीय तहमा गरी ११ घरधुरी विपद्बाट विस्थापित भएका छन् । चार स्थानीय तहमा गरी ३ सय १८ घरधुरी जोखिममा परेका छन् ।

सुस्ताका लागि २५ लाख, रोल्पाको सडक र पुल मर्मतमा ५० लाख
मुख्यमन्त्री कार्यालय देउखुरीमा शुक्रबार बसेको प्रदेश विपद् व्यवस्थापन परिषद्को बैठकले नवलपरासी (बर्दघाट–सुस्ता पश्चिम) को सुस्ता गाउँपालिका–५ स्थित नारायणी नदीपारिको सुस्ता क्षेत्रमा नदी कटान तथा बाढीको जोखिम न्यूनीकरणका लागि २५ लाख रुपैयाँ निकासा गर्ने निर्णय गरेको छ । प्रदेश विपद् व्यवस्थापन कोषबाट जलस्रोत तथा सिँचाइ विकास डिभिजन कार्यालय, नवलपरासी (बर्दघाट–सुस्ता पश्चिम) मार्फत उक्त रकम खर्च गरिनेछ ।