लुम्बिनी प्रदेशको नाकैमा पर्ने भैरहवा–लुम्बिनी–तौलिहवा सडक धुलाम्य र हिलाम्य छ । सडकको यो हालत भएपछि लुम्बिनी आउने आन्तरिक तथा बाह्य पर्यटकमा नकारात्मक असर परेको छ ।
ठेकेदारले लुम्बिनी प्रवेश गर्ने नाकामा अस्तव्यस्त ढङ्गले सडक भत्काउने र समयमै काम नसक्ने गर्दा जसोतसो लुम्बिनी पुग्ने पर्यटकहरू पनि दिक्क मान्ने गरेका छन् ।
सडक राम्रो नभएपछि लुम्बिनी आउने पर्यटकलाई नकारात्मक असर पर्दा पर्यटक सङ्ख्यासमेत घटेको लुम्बिनी विकास कोषका सूचना अधिकारी हरि राईले बताए ।
उनले लुम्बिनी आउने पर्यटक घट्नुको प्रमुख कारण सडक नै भएको दाबीसमेत गरे ।
भ्रमण वर्ष सुरु भएदेखि नै सडक समस्या समाधान गर्न सरोकारवाला निकायहरूले ठेकेदारलाई झकझक्याए पनि उनीहरूले बेवास्ता गरिरहेका छन् ।
लुम्बिनी विकास कोष नजिकै रहेको पर्साचोक र लोकरी चोकसम्म पिच गरे पनि अन्य स्थानका सडक अलपत्र रहेको राईको भनाइ छ ।
निर्माणमा लापरबाही पनि उस्तै
भैरहवा–लुम्बिनी–तौलिहवा सडकले लुम्बिनी आउनेजाने पर्यटकलाई जति सास्ती दिएको छ त्योभन्दा बढी निर्माण गरिएको सडकको गुणस्तरमा लापरबाही भएको छ । आयोजना र परामर्शदाताले फितलो अनुगमन गर्दा भारतीय निर्माण कम्पनी गाँवर कन्ट्रक्सन लिमिटेडले गुणस्तरहीन सामग्री प्रयोग गरेर सडक निर्माण गरिरहेको छ । ठेकेदार पक्षले सडकको बीच भागमा डिभाइडर छुट्याउन प्रयोग गरिने मिडियन कर्ब निर्माणमा लापरबाही गरी गुणस्तरहीन बनाइरहेको छ ।
निर्माण गरिएको मिडियन कर्ब फुटेर धुजाधुजा भइसकेको छ । ‘मिडियन कर्बका ठाउँमा २५ सेमि लामो र १० सेमि मोटो सिङ्गल पिस कर्बस्टोन राखिनुपर्ने हो तर मेसिनको प्रयोग गरेर सिधै सडकमा मिडियन कर्ब बनाइरहेकोे छ । क्युरिन नगरी बनाइँदा मिडियन कर्ब फुटेर धुजाधुजा भएको छ’, स्थानीय अशोक गुरुङले भने, ‘यस्तो गुणस्तरहीन काम हुँदा पनि जिम्मेवार निकाय मौन छन् ।’
ठेकेदारले केमा दिएनन् ध्यान ?
आयोजना र परामर्शदाताले फितलो अनुगमन गर्दा भैरहवा–लुम्बिनी–तौलिहवा सडकमा एकपछि अर्को लापरबाही हुने गरेको पाइएको छ ।
साभार
